स्वयम्भुया त्वाथः दयेकूगु सछिदँ क्यन

येँ (सन्ध्या टाइम्स)/विश्व सम्पदाया धलखय् लाःगु स्वयम्भु महाचैत्य तक थहां वनेगु त्वाथः दयेकूगु थुगुसी सछिदँ क्यंगु दु। वि.सं. १९६८ स न्यादँ बिकाः दयेकूगु उगु त्वाथः सछिदँय् क्यंगु लसताय् थ्वहे वइगु शुक्रवाः छगू विशेष ज्याझ्वः समेत याइगु जूगु दु। उगु त्वाथः थनिं सछिदँ न्ह्यः येँया नांजाःम्ह धनाढ्य सुब्बा तीर्थराज मानन्धरं दयेकूगु खः। अबलय् वय्कलं थःगु हे खर्चं भुइख्यलंनिसें स्वयम्भुया महाचैत्य तक थ्यंकेगु त्वाथः लिसें ससुद्यःया थासंनिसें शान्तिपू तक वनेगु त्वाथः दयेकादीगु खः ।

स्वयम्भु त्वाथः दयेकूगु थुगुसी सछिदँ क्यनीगु लसताय् सुब्बा तीर्थराजया न्याम्ह कायपिं मध्ये थौंकन्हय् दनिम्ह कायभाजु लक्ष्मीराज मानन्धर लिसें सकलें छेँजःपिं जानाः थ्व न्हि हनेत्यंगु खः। छेँजःपिंसं कनादी कथं थुकिया लसताय् थ्वहे वइगु शुक्रवाः स्वयम्भुइ सप्तविधान पुजा यायेगु ग्वसाः जुयाच्वंगु दु। लिसें वकुन्हु स्वयम्भु त्वाथःया थीथी थासय् तयातःपिं जीवजन्तु लगायत द्यःपिनि मूर्तिइ मत च्याकेगु लिसें स्वयम्भु महाचैत्यय् तयातःपिं पंचबुद्धपिंत न्हूगु वसः पनेगु व वसपोलपिनि गुलुपाः न्हूकथं जायेकेगु नं ग्वसाः दयेकातःगु दु ।

स्वयम्भु महाचैत्य दुगु उगु पर्वःयात संस्कृतं गोपुच्छ पर्वत नं धायेगु याःसा नेवाः भासं 'सँगुँ' धाइगु खः। उगु थासय् न्हापा पहाड गये थें गयाः मनूत थहां वनीगु खःसा लिपा स्वाहाने त्वाथः दयेकेवं च्वय् थहां वनीपिं धर्मावलम्बीतय्त तसकं अःपुगु खः ।