आःयात माओवादी तमज्याइगु
कार्यक्रमया आधारय् निगुलिं लाइन छथाय् च्वन
येँ (सन्ध्या टाइम्स)/छुं नं छगू पार्टी कार्यक्रमया आधारय् मेगु पार्टी नाप जानाः वनीगु एकता हे कार्यगत एकता खः। कार्यगत एकता यानाः थीथी बिचाःयापिं दलत नं तत्कालया लागिं छगू हे थासय् च्वनाः मंकाः उद्देश्य प्राप्तया नितिं नापं न्ह्याः वनेगु ज्या जुइ ।
तर एकीकृत माओवादी धाःसा छगू हे पार्टी खयां नं निगू लाइनया संघर्षं यानाः निगू थें च्वनेधुंकूगुलिं आः पार्टीयात छधी याना तयेगु लागिं निगू पार्टी कार्यक्रमया आधारय् छथाय् च्वनी थें थ्व पार्टी नं कार्यक्रमिक एकता यानाः छथासं च्वनेगु निर्णय जूगु दु। पार्टी दुने जुयाच्वंगु लाइन संघर्षयात आः थत्थेंया नितिं समाधान यायेगु अःपुगु उपाय कथं नेतातय्सं पार्टी छगू हे खःसां निगू गुट दथुइ कार्यक्रमिक एकता यायेगु तयारी याःगु खँ सीदुगु दु ।
माओवादी दुने थौंकन्हय् अध्यक्ष प्रचण्ड, उपाध्यक्ष मोहन बैद्य किरणया व मेम्ह उपाध्यक्ष लिसें प्रधानमन्त्री डा. बाबुराम भट्टराई स्वम्हेसिया अलग अलग लाइन कथं स्वंगू लाइन अस्तित्वय् वयाच्वंगु दु। थ्व स्वंगुलिं लाइनयात छथासं तयाः मिले याना वनेगु ल्याखं आःयात कार्यक्रमिक एकता धकाः संघर्षया कार्यक्रम बियाः तत्कालया निंतिं विवाद अन्त्य यायेगु तयारी जूगु खँ माओवादी सूत्रं धाःगु दु। थुकियात पार्टी छधी जुल धायेगु सिबें नं पार्टीयात टुक्रा जुइगुपाखें छुं ईया लागिं बचे यायेगु ज्या जुल धायेमालीगु खँ नं सूत्रं कंगु दु ।
स्वंगू हे लाइनयात मिले यायेगु कार्यक्रम कथं आःया अवस्थाय् जनसंविधानया निंतिं संघर्ष याना वनेगु धइगु लँपु माओवादीं ज्वंगु खः। उकिया नितिं विशेष यानाः थ्व इलय् पार्टी अध्यक्ष प्रचण्ड व उपाध्यक्ष बैद्यया दथुइ लगातार रुपं छलफल यानाच्वंगु दु। जनसंविधानया नितिं संघर्षया ज्याझ्वः तकं तयार जुइधुनेवं केन्द्रीय कमिटीया बैठक च्वनाः उकियात पारित याइगु व वयां लिपा वहे कार्यक्रमयात ताःलाकेगु ताः तयाः पार्टी छधी जुयाच्वनेगु खँ नं धाःगु दु ।
पार्टी दुने मूलतः स्वंगू लाइन दुसां थौंकन्हय् अध्यक्ष प्रचण्ड व उपाध्यक्ष बाबुरामया लाइन छथाय् च्वनाः छगू हे धार जुयाच्वंगु दुसा मोहन बैद्य किरणया मेगु हे धार जुयाः निगू धार न्ह्यानाच्वंगु दु। थ्व निगू धारया कार्यनीति, कार्यदिशा नापं विचार हे पानाच्वंगु अवस्थाय् आः थत्थें हे लाइन संघर्षयात अन्त्य यानाः वने फइगु अवस्था मदुगुलिं थथे 'कार्यक्रमिक एकता' याना वनेगु धइगु पार्टी एकताया न्हूगु सूत्र लागू याःगु खः ।
कार्यदिशा, कार्यनीति नापं विचारया बारे पार्टीया महाधिवेशनय् वनाः बहस यायेगु नापं आः न्हूगु संविधानया मस्यौदा इलय् हे पिकायेमाःगु जुयाः मस्यौदा वयेधुंकाः न्हूगु हे अवस्था ब्वलनेफुगु कारणं अनं लिपा पार्टीं ल्ह्वनेमाःगु पलाःयात ध्यानय् तयाः आः हे जनसंविधानया नितिं संघर्षया ज्याझ्वः पित हयेगु तयारी माओवादी नेतृत्वं याइ धाःगु दु ।
