डिजेल प्लान्ट संचालनया निंतिं बजेट माग

येँ(सन्ध्या टाइम्स)/उर्जा मन्त्रालयं थर्मल प्लान्ट संचालन यायेत धासें अर्थ मन्त्रालययाके बजेट माग याःगु दु। उर्जा मन्त्रालयं हेटौंडाया डिजेल व विराटनगरया मल्टिफ्युल प्लान्ट संचालन यायेत अनुदान कथं बजेट उपलब्ध यानाबीत पत्राचार याःगु खः।
डिजेल प्लान्ट संचालन यायेबलय् नीप्यतका तू वइगु खःसा थुकिं उत्पादन जुइगु मत मील धाःसा प्राधिकरणयात खुतका दां जक दइ। थुकी मगाःगु झिंच्यातका अनुदान उपलब्ध याना बीत धासें उर्जा मन्त्रालयं अर्थयात पौ छ्वःगु खः।
नेपाल विद्युत प्राधिकरणया अध्यक्ष लिसें उर्जा सचिव बालानन्द पौडेलं आर्थिक संकटय् दुगुलिं यानाः प्राधिकरणं थर्मल प्लान्ट संचालन याये फइगु अवस्था मदुगुलिं अनुदानया निंतिं अर्थयात पौ छ्वयागु खः धकाः धया दीगु दु। अनुदानया निंतिं पौ छवये धुंगु खःसा लिसः धाःसा मवःनिगु नं वय्कलं स्पष्ट यानादीगु दु।
निगुलिं प्लान्टया मर्मत यायेगु ज्या जुयाच्वंगु अवस्थाय् आःयात धाःसा २४ मेगावाट जक मत उत्पादन याये फयाच्वंगु व पूर्ण रुपं मर्मत यायेगु क्वचाल धाःसा निगुलिं प्लान्टं ४५ मेगावाट तक मत उत्पादन जुइगु नं वय्कलं कनादीगु दु।
प्लान्ट मर्मत यायेगु निंतिं माःगु ज्वलं आयात याये धुंगु व भंसार पुले मफुगुलिं झण्डै स्वला तक सामान अथें लानाच्वंगु नं वय्कलं धयादीगु दु। प्लान्ट मर्मतया निंतिं आयात याःगु पुर्जाया भंसार जक १३ करोड पुलेमाः।
लिपांगु इलय् प्राधिकरण आर्थिक संकटय् लानाच्वंगु दुसा थुकिं यानाः प्लान्ट संचालनय् हयेत नं समस्या जुयाच्वंगु दु। थिकेक न्यानाः दंकं मीमाःगु जूगुलिं तसकं थिके धयातःगु थुगु प्लान्ट संचालनय् यायेबलय् प्राधिकरणं प्रतियुनिट २/४० पैसा द्यापं फयेमाली।