निपा मिखां मखंसां छुं मपाःम्ह ध्वंसिं शाक्य

ख्वपया वडा नं.-४ बेखालय् छम्ह थज्याःम्ह ब्यक्तित्व दु गुम्ह निपां मिखां मखं तर थीथी कथंया सीपय् उलि हे निपुण। वय्कः मचाबलय् हे निपां मिखां छुं नःगुलिं भ्याः हे मिखां मखं। छपा मिखा छुं नःगुया छवाः लिपा हे हाकनं मेगु मिखा नं छुं नया बिउगु खः। मांम्ह चन्द्रमाया शाक्य लः कायेत पिहां वनाच्वंगु इलय् ध्वंसिंया मिखा छुं नःगु खः।
ध्वंसिं चन्द्रमायाया तःधिकःम्ह काय्। काय्म्ह मिखा मखंसां मांम्हेसिनं यायेमाःगु सुसाःकुसाः धाःसा बांलाक हे यानाच्वंगु खः। अथेनं मिखां मखंम्ह जुया ल्याय्म्ह बैंसय् नं वयागु सु नापं हे इहिपाः नं मजुल। आः याकःचा हे जूसां वय्कः थःगु छेँय् च्वनाः थीथी कथंया सीप प्रवर्द्धनय् लगे जुयाच्वनादीगु दु। खास यानाः ख्वपय् मिखां मखंपिं नापं ताः ई न्ह्यवंनिसें संगत यानाच्वनादीम्ह समाजसेवी ब्यक्तित्व रामबहादुर सिंह भेलेया संगतं हे वय्कः थन तक थ्यंकादीगु खः।
अपांग स्वाबलम्वन केन्द्र नामं ख्वपय् चायेकूगु छगू संस्थाय् वय्कः संलग्न जुसांनिसें थीथी कथंया सीप सयेकेगु ह्वताः चूलाकादीगु खः। पूर्ण विद्यागृहया नामं चले यानातःगु थीथी कक्षाय् बस्तु निर्माण व प्रदर्शनीइ ब्वति कयाः ध्वंसिं शाक्यं थःगु प्रतिभा क्यनेगु याना च्वनादीगु दु। वंगु मंसीर ८, ९ व १० गते
पद्म उच्च माविइ जूगु विद्युतीय प्रदर्शनीइ नं थःगु कला प्रदर्शन यानाः ध्वंसिं शाक्यं मिखां खंपिंत हे अजू चायेकादीगु दु।
थः चिचाधिकःम्ह काय पिहां वनेवं छुं भचा दुःख तायेकादीम्ह चन्द्रमाया शाक्यं आः थः काययागु सीपपाखें नं छुं राहत चूलानाच्वंगु कनादी। थः जहान २०४३ सालय् मदुसांनिसें हेमचन्द्र, चन्द्रबज्र, राजेन्द्र, ईश्वरी व हेराबज्र नांया थः कायपिं नापं न्हि छ्याना च्वनादीम्ह चन्द्रमायां थः काय थुलि सिपालु जुइ धकाः बिचाः हे मयाःगु जुयाच्वन। आः ८० दँ दयाः नं चन्द्रमायां थः काययात बजि जोरे यानाः नकेगु, चिया त्वंकेगु व थीथी सामान न्ह्यःने तयेगु याना च्वनादीगु दु। थथे थीथी कथंया ज्या यानाः थःगु सीप विकासय् मदिक्क ज्या यानाच्वनादीम्ह ध्वंसिं ध्वनय् मामं छायातःम्ह काय खः।

More Stories Like this