शासकीय स्वरुपं ब्वलंकूगु गतिरोध

राज्य पुनर्संरचनाया सवालय् जुयाच्वंगु विवाद आः राज्य पुनर्संरचना आयोगं समाधान याइ धकाः सकलें ढुक्क जुयाच्वंगु इलय् लाक्क उखे राज्यया शासकीय स्वरुप सम्बन्धी विवादं धाःसा विस्फोटक रुप काइगु सम्भावना पिहां वःगु दु। नेपाली कांग्रेस पूवंक हे संसदीय व्यवस्था लागू जुइमाः धइगु अडानय् च्वनाच्वंगु व मेगु दलत निर्वाचित सरकार प्रमुखया पक्षय् वनेवं थ्व गतिरोध पिहां वःगु खः। नेपाली कांग्रेस दुने नं मेगु छगू पुचः राज्यया कार्यकारी प्रमुख प्रधानमन्त्री जुइमा वा राष्ट्रपति जुइमा तर व प्रत्यक्ष निर्वाचित हे जुइमाः धइगु पक्षय् दुसां पार्टीया पुलांगु बिचाःयापिनि बहुमत दुगु संस्थापन पक्ष धाःसा पुलांगु हे संसदीय प्रणाली लागू जुइमाः धइगु अडानय् दु। थुथाय् लुमंकेमाःगु खँ छु धायेबलय् संसदं कार्यकारी प्रधानमन्त्री ल्ययेमाः धाइपिं कांग्रेसया अधिकांश नेतात उपिं हे गुमिसं पार्टी गणतन्त्रय् वनेगु तयारी याःबलय् राजतन्त्र हे माः धकाः वकालत याःगु खः। कांग्रेसया थ्व ख्वं बिचाः दुपिं नेतातय्सं राजतन्त्रया वकालत याःसां देश गणतन्त्रय् वनां तुं त्वःतल। आः नं उमिसं नेपाःया सन्दर्भय् ज्या लगे मजुइधुंकूगु संसदीय व्यवस्थाया वकालत याःसां मुलुक न्हूगु शासकीय प्रणालीइ प्रवेश जु हे जुइ धइगु आशा जुयाच्वंगु दु। शायद वहे कारणं जुइमाः, माओवादीया नेतातय्सं यदि प्रत्यक्ष निर्वाचित राष्ट्रपति प्रणालीइ मवनेगु खःसा संविधान दयेकेगु ज्या अवरुद्ध जुइ धकाः तप्यंक ख्याच्वः बिया हःगु दु। उकिं शासकीय स्वरुप गज्याःगु जुइमाः धइगु थ्व न्ह्यसः आः संविधानसभाया बहुमतं पारित यायेमाःगु अवस्थाय् थ्यनेफु। असहमत विषययात मतदानय् यंकेगु हे लोकतान्त्रिक पद्धति नं खः।

More Stories Like this