एमालेय् जातीय ध्रुवीकरण

जनजाति व गैरजनजाति सभासद्तय् अलग अलग भेला
येँ(सन्ध्या टाइम्स)/राज्य पुनर्संरचनाया विषयय् एमाले दुने जनजाति व गैरजनजाति नेता कार्यकर्ता दथुइ तब्या जुया वंगु ध्रुवीकरणया झ्वलय् आः निगू पुचःया अलग अलग भेला यानाः थःथःपिनि पुचः क्वातुकेगु ज्या समेत तीव्र रुपं सुरु जुया वःगु दु। थ्वहे झ्वलय् राज्य पुनर्संरचना पहिचानया आधारय् याये मजिउ धाइपिं गैर जनजाति नेता व सभासद्तय्सं उकुन्हु बोडेय् भेला यानाः थःपिनि खँ तयेत याःगु ज्याझ्वःयात काउन्टर बी कथं म्हिगः नगरकोटय् पहिचानया लिधंसाय् हे राज्य पुनर्संरचना यायेमाः धाइपिं जनजाति सभासद् व केन्द्रीय दुजःतय् बिस्कं भेला सःताः थःपिनि धापूयात अझ क्वातुक न्ह्यःने यंकेगु ज्याझ्वः जूगु दु। नगरकोटय् चछि अन हे च्वनेगु कथं जूगु उगु ज्याझ्वलय् संविधानसभाय् दुथ्याःपिं जनजाति सभासद् व दुमथ्याःपिं केन्द्रीय नेतात समेत यानाः करिब ४५ म्ह दुजःतय् उपस्थिति दुगु खः।
पार्टीया पोलिटब्युरो दुजः अशोक राई मूपाहां कथं वःगु उगु ज्याझ्वलय् स्थायी समितिया दुजः सिद्धिलाल सिंया नं उपस्थिति दुगु खँ सीदुगु दु।
उगु ज्याझ्वलय् नेपाःयात गज्याःगु संघीय गणतन्त्र माः व उकियात सफल यायेगु लागिं छु गज्याःगु पलाः ल्ह्वनेमाली धइगु विषयय् ज्यापौ हे न्ह्यब्वयाः सहलह ब्याकेगु ज्या जूगु खः। ज्याझ्वलय् संविधानसभाय् जनजाति सभासद्तय् पुचः ककसया संयोजक लिसें एमाले सभासद् पृथ्वी सुब्बा गुरुङं सहजकर्ताया भूमिका म्हितूगु खः। थ्व भेलां थौं थःपिनि रणनीति समेत दयेकी धाःगु दु।
संविधानसभाया राज्य पुनर्संरचना समितिइ एमालें १४ प्रदेशया खाकाय् थःपिनि मत बिउगु खःसां आः पार्टी दुनेया गैर जनजाति नेतातय्सं उकियात विफल यासें ६-७ प्रदेशया खाकायात समर्थन यायेगु तयारी यानाच्वंगुलिं उकिया विरोधय् जनजाति सभासद् व केन्द्रीय नेतात छप्पँ जुया वःगु खः।
थौंकन्हय् एमालेया न्ह्यागु ज्याझ्वलय् नं राज्य पुनर्संरचनाया बारे जनजाति व गैरजनजाति छुटे हे जुइक वादविवाद जुइगु जुया वःगु दुसा उकिया हे विकसित रुप कथं आः जनजाति व गैरजनजाति नेतातय् भेला हे बिस्कं बिस्कं यायेगु समेत सुरु जुया वःगु दु।
नेतातय् गठबन्धन नं 'ब्राम्हणवादी'?
थौंकन्हय् एमाले दुने न्हापा तसकं मिले मजूपिं नेतात झलनाथ खनाल व केपी ओली छगू हे 'क्याम्प'य् च्वं वःगु दु। उकी खनाल पक्षया वामदेव गौतम व ओली पक्षया माधव नेपाल नं दुथ्याः। पार्टीया शीर्ष नेतातय् दथुइ जूगु थ्व एकतायात नं अनया जनजाति नेतातय्सं 'ब्राम्हणवादी गठबन्धन' धया हःगु दु। वय्कःपिं प्यम्ह छथाय् लायेसातकि वामदेवया समेत बिचाः हिउगु खः।