स्थानीय निकाय हानं कर्मचारीयात

स्थानीय निकाय सञ्चालनया लागिं दयेकातःगु राजनीतिक संयन्त्र भंग याना बिउगु दु। अख्तियारपाखें अज्याःगु अवैध संरचना भंग याना छ्व धकाः बियाहःगु निर्देशनया लिधंसाय् सरकारं थ्व निकाय भंग याःगु खः। स्थानीय निकाय जनतालिसे प्रत्यक्ष सरोकार दइगु निकाय खः। उकिं अन जनतां हे ल्यया छ्वइपिं मनूत च्वनेमाःगु खः। थज्याःगु निकाय कर्मचारीयात त्वःतेबलय् सर्वसाधारण जनतां दुःख सीगु व भ्रष्टाचार व्याप्त जुइगु निश्चित दु। कर्मचारीपाखें जुइफुगु थज्याःगु अनियमित ज्यायात पनेगु लागिं हे राजनीतिक दलतय्सं संयन्त्र दयेकाः खटे याना तःगु खः। तर स्थानीय निकाय दुने थज्याःगु संयन्त्रं बांलाक ज्या याये मफुगु जक मखु उपिं समेत भ्रष्टाचारय् सरिक जूवंगु कारणं थुकिया औचित्य मदया वंगु खः। तर अज्याःगु संयन्त्र भंग यायेगु जक स्थानीय निकाय सञ्चालन यायेगु सही उपाय धाःसा मखु। राजनीतिक संयन्त्र भंग लिपा स्थानीय निकायय् आः कर्मचारीया झन हे तःधंगु मनोमानी जूइगु सम्भावना अप्वःगु दु। उकिं राजनीतिक संयन्त्र भंग लिपा सरकारं तुरुन्त हे उकिया थासय् मेगु संयन्त्र हयाः ज्या याकेमाः। थ्व इलय् चुनाव याये फइगु अवस्था नं मदु। उकिं बांलाःगु उपाय धइगु संविधानसभाया चुनावया लिच्वः स्वयाः गुगु थासय् गुगु दलयात अप्वः भोट वनाच्वंगु खः, उकिया हे लिधंसाय् सर्वदलीय संरचना दयेकाः ज्या यायेमाःगु खनेदु। लिसें उकी स्थानीय नागरिक समाजयात नं थाय् बिल धाःसा निकायया विश्वसनीयता नं दइ। तर न्ह्यागु हे विकल्प बीगु खःसां नं याकनं जुइमाः। थुकी गुलि लिबाइ उलि हे स्थानीय जनतां दुःख सी माली ।

More Stories Like this