ज्ञानमाला भजनया समापन ज्याझ्वः
किपू (सन्ध्या टाइम्स)/स्वन्हुयंकं न्ह्याःगु राष्ट्रिय ज्ञानमाला सम्मेलन वंगु शनिवाः झःझः धायेक क्वचाल। व्यवस्थापन समितिया नायः श्रीकृष्ण महर्जनया सभापतित्वय् न्ह्याःगु उगु ज्याझ्वलय् पर्यटन राज्यमन्त्री दिलिप महर्जन नं झाःगु खः। ज्याझ्वलय् न्ववासें वय्कलं ज्ञानमाला स्वयेबलय् आनन्द बीगु म्येँ जक थें च्वंसां नं अन्यायीपिनि नुगलय् क्रान्ति जुयाः भुखाय् ब्वयेकेगु ज्या यानाच्वंगु दु धयादिल। थुकिया लिसें वय्कलं ज्ञानमालां बिउगु ज्ञान व्यवहारय् नं छ्यले फःसा थुगु सम्मेलनया महत्व अझ अप्वइ धयादिल ।
ग्वसाः खलःया नायः सुवर्ण शाक्यं गोष्ठीया मूल्यांकन प्रतिवेदन न्ह्यब्वसें ज्ञानमाला मनोरञ्जनया निंतिं मखुसे भगवान बुद्ध व बुद्ध ज्ञानया प्रचार प्रसार यायेगु माध्यम खः धयादिल। वय्कलं शान्ति दुथाय् अथें न्ह्यइपुसे च्वनी धयादिल ।
पद्मावती ज्ञानमाला भजन खलःया नायः इन्द्रमुनी शाक्यं ज्याझ्वलय् ब्वति काःपिं सकसिगुं नेतृत्व यासें ज्याझ्वः झःझः धायेक क्वचाःगु नापं मेगु सम्मेलनया निंतिं योजना दयेकाः वनेमाःगु, सिरपाःया व्यवस्था जुइमाःगु, विदेश भ्रमणया अवसर बियाः प्रोत्साहित याये माःगु, प्रचार प्रसार लगायत झिंनिगू बुँदाया सुझाव न्ह्यब्वयादिल ।
ग्वसाः खलःया वरिष्ठ न्वकु किरणकुमार जोशीं बौद्ध जनजातिया भाषां नं ज्ञानमाला भजन निर्माण यायेगु, बौद्ध ज्याझ्वलय् लापा थाय् मजिउगु, धार्मिक, सांस्कृतिक पहिचान ल्यंकाः विकृति चीकेगु कुतः यायेगु, संघया दुजःपिंसं प्राणी हिंसा यानाः बलि प्रथा मयायेगु, बौद्ध धार्मिक स्थलय् बौद्ध क्रियाकलाप मयायेगु लगायत न्यागू बुँदाया घोषणा पत्र न्ह्यब्वयादिल ।
थुकिया लिसें प्रतिनिधिसभाया मुँज्या निला लिपा जक जुइगु नं उगु सम्मेलनं क्वःछिउगु खः। देय्न्यंकंया मुक्कं न्यय्स्वंगू भजन खलकं ब्वति काःगु उगु ज्याझ्वलय् नीछम्ह व्यक्तित्वं प्रतिनिधित्व याःगु खः। वंगु आइतवाः बन्द शत्र जूगु खःसा शनिवाः मूपाहां शनिवाः भिक्षु अश्वघोष महास्थवीरं ज्याझ्वःया उलेज्या यानाबिज्याःगु खः ।
