छेँ थुं वःसा डोजर क्वय् द्यनीगु
येँ (सन्ध्या टाइम्स)/लँ तब्या यायेगु नामय् येँ देय्या थीथी लागाय् च्वंगु छेँ थुनेगु सुरु यायेवं उकिया विरोधय् स्थानीय जनता संगठित जुया वःगु दु। थ्व झ्वलय् बालाजु लागाया जनतां यदि थःपिनि छेँ थुं वल धाःसा डोजरया न्ह्यःने ग्वारातुलाः विरोध यायेगु तयारी समेत याःगु दुसा थुकिया बारे सहलह यायेत कन्हय् त्वाःया बैठक समेत सःतूगु दु। उगु लागाया जनतां थःपिनि छेँ-बुँया आधिकारिक भ्वं मुंकाः सरकारयात क्यनेगु तयारी नं यानाच्वंगु दु ।
थ्वहे झ्वलय् नगर विकासं आः सतक विस्तारया लागिं २०३३ सालया गुगु ऐन न्ह्यःने हया च्वंगु खः उकियात पाय्छि मजू धकाः येँ मनपां मेयर पीएल सिंहया पालय् हे अस्वीकार यासें उकियात ल्वयेक संशोधन यायेगु लागिं सरकारयात पौ च्वया छ्वयेधुंकूगु खँ सीदुगु दु ।
