किसिं स्वम्ह मनू स्याना बिल

येँ (सन्ध्या टाइम्स)/झापाय् थौं सुथय् किसिं आक्रमण यानाः स्वम्हेसित स्याना बिउगु दुसा मेपिं निम्ह गम्भीर घाःपाः जूगु दु। सुथय् सवा ८ बजे किसिं आक्रमण याःगु खः। आक्रमणय् लानाः पृथ्वीनगर ८ या ५७ दँ दुम्ह दुर्गा पाण्डे व ६८ दँ दुम्ह गनमाया बस्नेत घटनास्थलय् हे सीगु खःसा वासः यायेत यंकाच्वंगु इलय् उगु हे गाविसया ७५ दँया आइतमाया राई लँय् हे सीगु खः। किसिया आक्रमणय् लानाः उगु हे गाविस वडा नं. ५ या १९ दँ दुम्ह गंगा ओलीयात भरतपुरय् च्वंगु पाथीभार अस्पतालय् अथे हे वडा नं. ८ या ६३ दँ दुम्ह जाँचबहादुर लिम्बूयात मेची अञ्चल अस्पताय् वासः यायेगु ज्या जुयाच्वंगु दु। भारतया जंगलं वःपिं निम्ह किसितय्सं अथे आक्रमण याःगु खः। अथे किसिं आक्रमण यानाः स्वम्ह मनूत सीवं उगु गामय् आतंकित जूगु दु ।