माओवादी विरुद्ध कोइरालां आन्दोलन याइगु?
येँ (सन्ध्या टाइम्स)/एकीकृत माओवादीं सहमति तत्काल कार्यान्वयन मयात धाःसा माओवादी विरुद्ध आन्दोलन यायेगु जुइगु ख्याच्वः नेपाली कांग्रेसया सभापति सुशील कोइरालां बियादीगु दु। वय्कलं न्हय्गू बुँदाया सहमति कथं तत्काल कब्जा यानातःगु छेँ व जग्गा लित बीमाःगु, वाइसीएल भंग यायेगु ज्या मयात धाःसा देय्न्यंकं आन्दोलन यायेगु ख्याच्वः बियादीगु खः। पार्टी ज्याया झ्वलय् स्यांजा थ्यंम्ह नेता कोइरालां थौं सुथय् प्रेस युनियनं याःगु पत्रकार भेटघाटया झ्वलय् उगु ख्याच्वः बियादीगु खः ।
माओवादीं न्हयूगु बुँदाया सहमति कार्यान्वयन मयाःगुलिं शान्ति व संविधान च्वयेगु ज्या सन्तोषजनक कथं न्ह्याः मवंगु खँ न्ह्यथँसें नेता कोइरालां सहमतियात तत्काल कार्यान्वयन यायेत बः बियादीगु दु। संविधान निर्माणय् विवाद जुयाच्वंगु शासकीय स्वरुपया सवालय् कांग्रेस गुगुं नं हालतय् लिमचिलीगु खँ नं वय्कलं कनादिल। वय्कलं कांग्रेसया लाइन धइगु संसदीय प्रणाली हे खः धासें नेपाःया सन्दर्भय् संसदं निर्वाचित संवैधानिक राष्ट्रपति अले कार्यकारी अधिकार सहितया प्रधानमन्त्री हे जुइमाः धकाः नं स्पष्ट यानादिल। वय्कलं धयादिल, 'संसदपाखें निर्वाचित संवैधानिक राष्ट्रपति व कार्यकारी प्रधानमन्त्री हे जुइमाः। कांग्रेस थ्व अडानं लिचिली मखु। छाय्धाःसा कांग्रेसया जक मखु सारा नेपाःमिया हे थ्व सः खः ।'
कांग्रेस सभापति कोइरालां पार्टी दुने सामान्य मतमतान्तर जक खने दुगुयात संचार माध्यमं बय्बय् यानाच्वंगु दु धासें उज्वःगु भ्रम ब्वलंकेगु ज्या मयायेत इनाप नं यानादिल ।
