बन्दयात वैद्य पक्षया समर्थन
येँ (सन्ध्या टाइम्स)/बहिर्गमित जनमुक्ति सेना नेपालं थौं आह्वान याःगु नेपाल बन्दयात माओवादीया बरिष्ठ उपाध्यक्ष मोहन बैद्य किरण पक्षं समर्थन प्वंकूगु दु। किरण पक्षया छगू दर्जनं मल्याक जनवर्गीय संगठनतय्सं पुलांपिं लडाकुतय् मागयात नं ऐक्यबद्धता प्वंकूगु खः ।
सरकारं बन्द स्थगित यानाः वार्ताय् वयेत पुलांपिं लडाकुतय्त आह्वान याःगु दुसां उमिसं वार्तायात अस्वीकार यासें बन्दयात यथावत हे तःगु दु। बन्दं यानाः स्वनिगलं पिनेया जनजीवन प्रभावित जूगु दुसा स्वनिगलय् धाःसा खास लिच्वः लाःगु मदु ।
पुलांपिं लडाकुतय्सं थःपिंत अयोग्य धकाः बियातःगु बिल्ला खारेज यायेमाःगु, थःपिनि व्यवस्थापनया निंतिं आर्थिक प्याकेज बीमाःगु, राष्ट्र संघपाखें थःपिनि निंतिं धकाः वःगु ध्यबा पारदर्शी यायेमाःगु नापं पुलांपिं लडाकुतय्त तयातःगु मुद्दा खारेज यायेमाःगु माग यासें वंगु छुं न्हि न्ह्यवंनिसें आन्दोलन याना वयाच्वंगु खः ।
