लडाकुया बन्दय् गाडी तोडफोड
येँ (सन्ध्या टाइम्स)/पुलांपिं माओवादी लडाकुतय्सं याःगु बन्दय् अप्रिय घटना मजुइमा धकाः थौं सुथंनिसें व्यापक रुपं प्रहरी परिचालन याःसां प्रदर्शनकारीतय्सं थीथी जिल्लाय् गाडी च्याकेगु व तोडफोड यायेगु ज्या याःगु दु। लिसें प्रहरीं नं थौं आपालं प्रदर्शनकारीतय्त ज्वंगु दु।
प्रदर्शनकारीतय्सं थौं यलय् निगः गाडी तोडफोड याःगु दुसा प्रहरीं हरिहर भवन लागां स्वम्हेसित ज्वंगु दु। अथे हे येँया चाबही लागां च्याम्ह व कुपण्डोल लागां न्याम्हेसित ज्वंगु दु ।
हेटौंडाय् युनिलिभर कम्पनीया मजदूर व कर्मचारी काःवंगु गाडी च्याका बिउगु दु। ना. ४ ख ४३४२ नम्बरया बसयात सुथय् पौने ५बजे हे च्याका बिउगु खः। मेखे पूर्व पश्चिम राजमार्गय् नं चले यानाहःगु गाडी तोडफोड याना बिउगु दु। अथे हे छगः ट्याक्टर च्याका बिउगु दु। बाग्लुङय् नं सुरेश गायक व नरबहादुर घर्ती नांया निम्ह पूर्व लडाकुतय्त ज्वंगु दु ।
थौंया बन्द ताःलाकेत म्हिगः बहनी येँया शान्ति बाटिकां पिकाःगु मसाल जुलुसयात नं प्रहरीं हस्तक्षेप यानाः न्यय्म्हं मल्याक प्रदर्शनकारीतय्त ज्वंगु खः। प्रहरीं हस्तक्षेपं यानाः लिपा उमिसं छापामार शैलीं मसाल जुलुस पिकाःगु खः। थौं नं सुथय् येँया थीथी थासय् चिचीधंगु जुलुस पिकाःगु दु। तर बन्दं स्वनिगःयात धाःसा छुं हे लिच्वः मलाकल ।
बन्दं यानाः माओवादी बैठक स्थगित
बहिर्गमित जनमुक्ति सेनां थौं याःगु बन्दं माओवादीया थौं च्वनेमाःगु केन्द्रीय समितिया बैठक स्थगित जूगु दु। थौंया बैठकय् न्ववाये ल्यं दनिपिं निम्ह केन्द्रीय सदस्यतय्सं न्ववाये धुंकाः पार्टीया अध्यक्ष प्रचण्ड व उपाध्यक्ष मोहन बैद्य किरणं अन वःगु न्ह्यसःया लिसः बीगु धयातःगु खःसां बैठक स्थगित खः। मेगु बैठक गबले च्वनीगु खः सीमदुनि ।
