शासकीय स्वरुपय् कांग्रेसया ख्वं बिचाः
न्हूगु संविधानय् गज्याःगु शासकीय प्रणाली यायेमाली धइगु बारे जुयाच्वंगु विवाद क्वचाये मफयाः हानं छक्वः संविधान च्वयेगु ज्या संकटय् लाःवंगु दु। थ्व विवादय् नेपाली कांग्रेसया संस्थापन पक्ष अझ नं यथास्थितिवादी लाइनय् हे अडिग जुयाच्वंगु कारणं विवाद समाधान जुइ मफुगु खः। मुक्कं नेपाःया पुनर्संरचना यानाः शासकीय प्रणालीइ नं आमूल हिउपाः हयेगु व उकिया लागिं संसदं प्रधानमन्त्री ल्ययेगु पुलांगु स्वरुपयात त्वःताः जनतां हे प्रत्यक्ष रुपं कार्यकारी राष्ट्रपति ल्ययेगु न्हूगु प्रणाली नालेगु धकाः चर्चा जूगु खः। वास्तवय् संसदं कार्यकारी अधिकार सहितया प्रधानमन्त्री ल्ययेगु प्रणालीयात त्वःताः प्रत्यक्ष निर्वाचनपाखें सरकार प्रमुख ल्ययेगु विधि ज्वनेमाल धकाः खँ वयाच्वंगु धाःसा आः मखु। संसदं ल्यइम्ह प्रधानमन्त्रीयात संसदं हे खुला खुलाय् हित्तुहिलाः गबलें हे स्थिर सरकार दयेके मफुगु स्थिति पिहां वयेवं थनिं खुदँ न्हय्दँ न्ह्यः हे जनतां प्रत्यक्ष ल्यइम्ह सरकार प्रमुख माल धइगु विषयय् वहस सुरु जुइधुंकूगु खः। उबलय् थ्व वहस नेपाली कांग्रेसया हे छुं बुद्धिजीवीतय्सं ल्ह्वना हःगु खः। तर थौं नेपाली कांग्रेस हे थ्व प्रणालीया विरुद्ध दनाः न्हूगु प्रणालीयात पनाच्वंगु दु। यदि नेपाः हानं वहे संसदीय प्रणालीइ वन धाःसा देशय् हानं हानं नं न्हापा थें हे सरकार परिवर्तनया कासा जक जुयाः राजनीतियात अस्थिर याना तइगु निश्चित दु। उकिं संसदया बहुमतं कार्यकारी अधिकार सहितया सरकार प्रमुख ल्ययेगु ज्या नेपाः थेंज्याःगु देशया लागिं उपयुक्त खने मदु। जनतायात हिउपाःया आभास बीगु लागिं नं न्हूगु प्रणालीपाखे वने हे माः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
