शुक्रवाःनिसें पेट्रोल दइ
येँ(सन्ध्या टाइम्स)/नेपाल आयल निगमं शुक्रवाःनिसें पेट्रोलियम पदार्थया आपूर्ति सहज रुपं जुइ धाःगु दु। निगमं म्हिगः भारतीय आयल निगमयात डेढ अर्ब तका छ्वःगु खः।
बक्यौता वयेवं भारतया आयल निगमं पेट्रोलियम पदार्थ बीगु सुरु याःगु दु। निगमं म्हिगः कर्मचारी सञ्चय कोषपाखें डेढ अर्ब तका त्यासा कयाः भारतीय आयल निगमयात छ्वःगु खः।
निगमया प्रवक्ता मुकुन्द प्रसाद ढुंगेलं शुक्रवाःनिसें हे पेट्रोलियम पदार्थ सहज रुपं इनेगु ज्या जुइगु संचारकर्मीतय्त जानकारी बियादीगु दु ।
स्वनिगलय् पेट्रोलियम पदार्थ अभाव जूगुलिं सार्वजनिक यातायात तकं म्हो संचालन जूगुलिं छुं दिं न्ह्यवंनिसें सुथय् व बहनी यात्रुतय्त थाकुयाच्वंगु खः।
