थौं पुलांपिं लडाकुया मसाल जुलस
येँ (सन्ध्या टाइम्स)/पुलांपिं लडाकुतय्सं थौं देय्न्यंकं मसाल जुलुस पिकाइगु जूगु दु। बहिर्गमित जनमुक्ति सेना नेपाल धइगु नां तयाः आन्दोलनय् कुहां वयाच्वंपिं पुलांपिं लडाकुतय्सं थौं बहनी येँय् रत्नपार्क, यलय् लगंख्यः अले ख्वपय् सूर्य विनायकं मसाल जुलुस पिकायेगु खँ बहिर्गमित जनमुक्ति सेना नेपालया केन्द्रीय महासचिव कृष्णप्रसाद दंगालं 'सन्ध्या टाइम्स'यात कनादीगु दु ।
वय्कलं थःपिंत बियातःगु कथित अयोग्य लडाकुया बिल्ला खारेज यायेमाःगु, दीर्घकालिन व्यवस्थापनया निंतिं आर्थिक प्याकेज हयेमाःगु, राष्ट्र संघं पुनर्सस्थापनाया निंतिं धकाः हःगु प्याकेजया हिसाब सार्वजनिक यायेमाःगु नापं पुलांपिं लडाकुतय्त तयातःगु झुठ्ठा मुद्दा खारेज यायेमाःगु प्यंगू सूत्रीय माग पूरा मजूतले हे आन्दोलन जारी जुइ धयादीगु दु ।
वंगु पुष १४ गतेनिसें थाय्थासय् क्षेत्रीय स्तरया बन्द ज्याझ्वः याना वयाच्वंगु उगु संगठनं कन्हय् नेपाल बन्द यायेगु घोषणा यानातःगु दु। थःपिंसं आह्वान यानागु नेपाल बन्दयात अबज्ञा यात धाःसा कारवाही यायेगु ख्याच्वः नं महासचिव दंगालं बियादीगु दु। तत्कालिन अवस्थाय् अयोग्य लडाकु धकाः अनमिनपाखें प्यद्वः व च्याम्हेसित शिविरं पिने तःगु खः ।
बहिर्गमित जनमुक्ति सेना नेपालया महासचिव दंगालं थःपिनिगु आन्दोलन व मागयात एकीकृत माओवादीया मोहन बैद्य किरण पक्षधरं सकारात्मक रुपं कयाच्वंगु दु धयादिसें पार्टीया छुं नं लाइनया समर्थन वा विरोधय् अथे थःपिं आन्दोलनय् क्वहां वयागु मखु धकाः नं स्पष्ट यानादीगु दु ।
