बेलायतय् नेवाः छेँ

मू पाहानं नेवाः छेँया लागि थःगु चुरा त्वःताः लःल्हात

न्हुगु शताब्दीया न्हुगु पहः कथं नेपालं पिने नं नेवाःत मुनेगु क्रम अप्वयाच्वंगु दु । अले थुकेया छगु दसु जुल बेलायतय् जूगु बृहत नेवाः भेला । गुगु भेलां बेलायतय् नेवाः छेँ देकेगु खँ नं क्वःछिगु दु ।

लन्डनया अल्पटनय् नेपाल संवत ११२९ तछला मे ३१ तारिख खुनु जूगु थ्व ज्याझ्वलय् द्वःछिं अप्वसिनं ब्वति काःगु खः । ज्याझ्वलय् युके पासा पुचः गुठिया विधान व सांस्कृतिक क्यालेण्डर विषयस आयोजकपाखें खँ न्ह्यब्वःगु खः । च्वछायेबहःगु खँ ला बेलायतय् नेवाः छेँ दयेकेया निंतिं मु पाहां जुयादिम्ह मैया देवी श्रेष्ठजुं थःगु चुरा त्वःताः संयोजक महन्त श्रेष्ठयात लःल्हानादिल । अले मेमेपिं सहभागिपाखें यानां नेवाः छेँया निंतिं हजारौं पाउन्ड उठे जुल ।

बेलायतय् च्वनाच्वंपिं नेवाः प्रतिभापिन्त हनेगु झ्वलय् युके पासा पुचः गुथिया संस्थापक भाजु मय्जुपिं इश्वर मानन्धर, अमृत स्थापित, महन्त श्रेष्ठ, बालमुकुन्द प्रसाद जोशी, उत्तम गोविन्द अमात्य, डा. धर्म शाक्य, शशी मानन्धर, रामेश्वर डंगोल, अर्जुन प्रधान, स्व. जीत बहादुर टंडनया जहान मन टंडनयात हंगु खः । ज्याझ्वःयात झः झः धायेकेतः लाखे, मन्जुश्री, पुलुकिसि व मस्तय्गु प्याखं न्हयब्वःगु खः ।

ज्याझ्वः न्हयइपुक अले तःजिक क्वचाःगु खँ छम्ह आयोजक भाजुं नेपालमण्डलयात कनादिगु दु । आशा याये थ्व बृहत नेवाः भेलां क्वःछिगु खँ त याकनं हे पूवनी ।

More Stories Like this