आः स्थानीय निकाय छु जुइ?
प्यंगू विकल्प बारे स्थानीय विकास मन्त्रालयय् सहलह
येँ (सन्ध्या टाइम्स)/स्थानीय निकाय सञ्चालनया लागिं दयेका तःगु राजनीतिक संयन्त्र सरकारं भंग यायेवं महानगरपालिका, नगरपालिका, गाविस थेंज्याःगु स्थानीय निकाय आः पूर्ण रुपं हे कर्मचारीया ल्हातय् लाः वंगु दु। स्थानीय निकायया सर्वदलीय संयन्त्र भंग याये धुंकाः आः सरकारं छु याइ धकाः प्यखेरं न्ह्यसः पिहां वःगु दु ।
स्थानीय विकास मन्त्रालयया प्रवक्ताया कथं आः थ्व राजनीतिक संयन्त्र भंग लिपा सरकारया न्ह्यःने प्यंगू विकल्प दु - १) संविधानसभा चुनावय् कुतुं वंगु मतया लिधंसाय् फुक्कं दल दुथ्याकाः मेगु सर्वदलीय संयन्त्र दयेकेगु, २) नागरिक समाजया मनू समेत दुथ्याकाः परिषद गठन यायेगु, ३) आःया हे संरचनाय् नागरिक समाजयात नं दुथ्याकाः मेगु संरचना दयेकेगु व ४) कर्मचारीयागु हे समिति दयेकेगु ।
मन्त्रालय दुने थ्व प्यंगू विकल्प बारे खँल्हाबल्हा जुयाच्वंगु व थुकी मध्ये हे छगू लागू यायेगु बारे बिचाः जुयाच्वंगु खँ नं वय्कलं कनादिल। न्हूगु निर्णय मजूतले धाःसा स्थानीय निकाय कर्मचारीं हे चले याइ ।
संयन्त्र भंगयात एमालेया विरोध
एमालेया सचिव शंकर पोखरेलं स्थानीय निकायया सर्वदलीय संयन्त्र भंग याःगु ज्यायाविरोध यानादीगु दु। सरकारं स्थानीय निकायया सर्वदलीय संयन्त्र भंग याःगु स्वेच्छाचारी ज्या जूगु द्वपं वय्कलं बियादीगु दु। प्रेस चौतारी नेपालं थौं बाग्लुङय् याःगु पत्रकार भेटघाट ज्याझ्वलय् न्ववासें नेता पोखरेलं अथे धयादीगु खः। वय्कलं सरकारया उगु निर्णय अन्तरिम संविधानया भावनाया अःखः जूगु टिप्पणी नं यानादिल। वय्कलं धयादिल 'कि स्थानीय निकायया निर्वाचन यायेमाल कि मखुसा सर्वदलीय संयन्त्र भंग याये मजिउ।' नेता पोखरेलं माओवादीया कारणं हे देशय् शान्ति व संविधानं गति काये मफयाच्वंगु दावी यासें धयादिल, 'माओवादीं विगतय् याःगु सम्झौतायात कार्यान्वयन याःगु मदुनि। माओवादीयात विश्वास यानाः फँसे जूगु खः, आः प्रतिबद्धता मखु कार्यान्वयन यायेमाः, माओवादीं ल्वाभः नापं लडाकुयात व्यवस्थापन मयाःतले संविधान जारी जुइ मखु ।'
