ब्रम्हू व क्षेत्री जातिया पहिचानया न्ह्यसः

देशय् जातीय पहिचानया खँ चर्चाय् वयेवं आः ब्रम्हू क्षेत्री जातिया पहिचानया बारे नं चर्चा सुरु जूगु दु। खास यानाः एनेकपा (माओवादी) या अध्यक्ष प्रचण्डं पहिचान मदुपिनि पहिचान कायम यायेगु झ्वलय् पहिचान दुगु जातितय् म्हसीका छाय् तंका छ्वयेगु न्ह्यसः तयादीवं थ्व चर्चां थाय् काःगु खः। वास्तवय् देशय् दुगु फुक्कं जातिया पहिचानया रक्षा याये धइगु बिचारं वय्कलं थ्व न्ह्यसः तयादीगु जुइमाः ।

वय्कलं धयादीगु थ्व खँया छगू सकरात्मक पक्ष छु दु धायेबलय् ब्रम्हू व क्षेत्री जाति, उकिसनं ब्रम्हू जातिया आपालं बुद्धिजीवीतय्सं म्हिगः तक पहिचानया खँ हे ल्हायेगु मयाः। पहिचानया खँ वल कि उकियात जातीय, साम्प्रदायिक आदि आदि धकाः थाय् मबीत स्वइगु खः। थौं उमिसं नं पहिचानया खँ ल्हानाहल। उकिया अर्थ उमिसं मेमेगु जातिया पहिचानयात नं स्वीकार याःगु अर्थय् थुइकेमाः। उकुुन्हु तक उमिसं देय्या मेमेगु जातियात 'अन्य' य् लाका तःगु खः, थौं थःगु जातियात 'अन्य' दुने लाका बीवं थ्व जातिपाखें नं पहिचानया न्ह्यसः न्ह्यःने तये हःगु दु। थ्व माग छम्ह ब्रम्हू जातियाम्ह हे नेतापाखें न्ह्यःने तये हःगु झन् हे सकारात्मक पक्ष खः। आः थ्व वहसयात दिकेगु मखुसें न्ह्यःने यंकेगु हे निकासपाखे न्ह्यायेगु जुइ। ब्रम्हू व क्षेत्री जातिं नं थःगु पहिचान मालेगु खःसा उमिगु खास पहिचान थनया गुगु लागाय् दु, उकिया नं खोज जुइमाल। ब्रम्हू क्षेत्री जातिं यदि मेमेगु जातिया पहिचान व उकिया अस्तित्व कायम जुइमाः धइगु सिद्धान्तयात स्वीकार याःगु खःसा उमिगु अस्तित्वयात नं मेमेगु जातिं अस्वीकार याये माःगु आवश्यकता मदु ।

More Stories Like this