राजसंस्था लित हयेत भूमिगत संस्थाया ज्याझ्वःत

येँ(सन्ध्या टाइम्स)/देय् संघीय लोकतान्त्रिक गणतन्त्र घोषित जुइधुंकूगु अवस्थाय् हानं राजसंस्था म्वाका हयेगु ताः तयाः छथ्वः मनूतय्सं भूमिगत रुपं राजसंस्था पुनर्स्थापना संघर्ष समिति स्वनाः थःपिनि गतिविधि न्ह्याकाहःगु दु। वंगु मंसिर १७ गते यलय् राजसंस्था पुनर्स्थापना संघर्ष समिति गठन याःगु खः। थ्व झ्वलय् उगु समितिं छगू प्रशिक्षण ज्याझ्वः नं यायेधुंकूगु दु। संस्थाय् आः तकया दुने १६० म्ह दुजः जुइधुंकूगु खँ 'बुद्धवाणी' नांगु वाःपतिइ समाचार कथं पिहां वःगु दु।
अथे हे आः वइगु चैत्र १ गते उमिसं सार्वजनिक रुपं छगू पत्रकार सम्मेलन यानाः राजसंस्था पुनर्स्थापनाया नितिं सरकारयात ३५ न्हुया अल्टिमेतम बीगु व वयां लिपा राजसंस्था पुनर्स्थापनाया नितिं निरन्तर संघर्ष यायेगु खँ धाःगु दु। थौंकन्हय् फेसबुकया माध्यमं प्रचार प्रसार यानाच्वंगु उगु संस्थाया नेतृत्व सुनां यानाच्वंगु दु धइगु खँ धाःसा सीमदुनि। अय्नं सूत्रतय्सं धाः कथं थुकी स्वनिगःया गुलिखे स्थानीय मनूत नं दुथ्यानाच्वंगु दु।