बलिदान याइपिं सभासद्त मालाच्वन
येँ(सन्ध्या टाइम्स)/नेकपा (एमाले) या स्वम्ह वरिष्ठ नेतातय्त संविधानसभाय् यंकेगु धकाः पार्टीं सुरु याःगु पहल आःयात स्थगित जूसां स्वंगूगु वरियताय् लाःम्ह नेता केपी ओली छम्हेसिया धाःसा सभासद् जुइगु रहर अझ नं मतंनिगु जुयाच्वन।
वय्कःपिंत संविधानसभाय् यंकेगु लागिं पार्टी तयार दु तर उकिया लागिं सुं नं सभासद्यात पद त्वःतेगु लागिं पार्टीं संस्थागत निर्णय धाःसा मयायेगु धकाः निर्णय यायेवं नेता ओलीं आः थःगु लागिं पद त्वःतीपिं सभासद्त थम्हं हे मालेगु कुतः न्ह्याकादीगु खँ सीदुगु दु।
थ्वहे झ्वलय् वय्कलं वंगु वालय् तिनि सभासद् पासाङ शेर्पायात सःताः थःगु लागिं पद त्वःतेत इनाप यानादीगु खँ सीदुगु दु। सभासद् शेर्पायात थःगु हे छेँय् सःताः वय्कलं आः सुयातं पद त्वःति धकाः पार्टीं निर्णय मयाइगु जूगुलिं शेर्पा थम्हं हे पद त्वःते माली धकाः इनाप यानादीगु खः।
लिसें वय्कलं शेर्पायात संविधानसभा दुने जनजातितय्सं दयेकातःगु ककसय् नं अप्वः सक्रिय जुइ मते धकाः परोक्ष रुपं धयादीगु खँ सूत्रं कंगु दु।
सूत्रं बिउगु जानकारी कथं सभासद् शेर्पां धाःसा थःत पार्टीं तप्यंक मनोनित याःगु मखुसें तत्कालिन सरकारं मनोनित याःगु जूगुलिं पार्टीया लागिं धकाः याकःचां राजीनामा बी मछिं धकाः लिसः बियादीगु खः।
एमालेपाखें थ्व स्वयां न्ह्यः ओली लगायत उपाध्यक्ष वामदेव गौतम व अमृत बोहरायात नं संविधानसभाय् यंकेगु धकाः तयारी याःगु खः। तर उमित संविधानसभाय् यंकेगु लागिं आः संविधानसभाय् दुपिं स्वम्ह जनजाति सभासद्यात राजीनामा बीकेगु खँ चर्चाय् वयेवं पार्टीया जनजाति नेतातय्सं विरोध याःगुलिं थ्व पलाःयात स्थगित याःगु खः।
