राष्ट्रपति बारे अझ नं विवाद
येँ (सन्ध्या टाइम्स)/न्हूगु संविधानय् शासकीय स्वरुप गज्याःगु जुइमाः धइगु खँय् कांग्रेसं कयाच्वंगु अडानं यानाः आः तकं छुं हे निर्णय याये मफयाच्वंगु दु। म्हिगः च्वंगु शीर्ष नेतातय्गु बैठकं छुं निर्णय याये मफुसेंलि थौं सुथय् हानं बैठक च्वनसा व नं असफल जुसेंलि न्हिनय् हानं मेगु बैठक च्वनेगु सहमति याःगु दु ।
थ्व विषयय् जुयाच्वंगु विवाद यदि सहमतिपाखें क्वचायेके मफुत धाःसा मतदान यानाःसां क्वचायेके माली धकाः एमाले व माओवादीं तःगु प्रस्तावयात नं कांग्रेसं अस्वीकार यासें थज्याःगु गम्भीर विषयय् मतदान मखु सहमतिं हे निर्णय यायेमाः धकाः मतदानया ज्यायात नं पना तःगु दु।
न्हूगु नेपाःया शासकीय स्वरुप गज्याःगु जुइमाः धइगु खँय् जुयाच्वंगु विवादया झ्वलय् माओवादी व एमालें कार्यकारी प्रमुख प्रत्यक्ष निर्वाचनपाखें वयेमाः धकाः अडान कयाच्वंगु दुसा कांग्रेसं संसदपाखें ल्यःम्ह प्रधानमन्त्री हे कार्यकारी जुइमाः धकाः अडान कयाच्वंगु दु। प्रत्यक्ष ल्यया हःम्ह राष्ट्रपति निरंकुश जुइगु दावी यासें कांग्रेसं संसदं ल्यःम्ह प्रधानमन्त्रीयात हे कार्यकारी यायेमाः धइगु तर्क न्ह्यःने हयाच्वंगु खः। तर माओवादी व एमालें संसदं प्रधानमन्त्री ल्ययेगु प्रणालीं यानाः खुला खुलाय् हे सरकार क्वःथलेगु कासा जुयाः गबलें हे स्थिर सरकार वये मफुगु कारणं आः प्रत्यक्ष निर्वाचनपाखें वइम्ह राष्ट्रपतियात हे कार्यकारी दयेकेगु व वयात न्यादँ तक ढुक्क जुइक शासन याकेमाः धइगु प्रस्ताव न्ह्यःने हःगु खः ।
सूत्रतय्सं धाः कथं प्रत्यक्ष निर्वाचनपाखें राष्ट्रपति ल्ययेगु ज्या जुल धाःसा माओवादीं राष्ट्रपति पद त्याकाः निरंकुश शासन न्ह्याकी धइगु ग्याःचिकु कांग्रेसयात जुयाच्वंगु दु। संसदं हे प्रधानमन्त्री ल्ययेगु ज्या जुइमाः धकाः थौंकन्हय् अप्वः सः तयेगु ज्याय् संसदीय दलया नेता रामचन्द्र पौडेल दकलय् न्ह्यःने लानाच्वंगु दु। वय्कःया अडानं यानाः संविधान च्वज्या सम्बन्धी थीथी विवाद समाधान याना वनेगु धकाः संविधानसभाया समितिं दयेकातःगु समयतालिका नापं प्रभावित जुयाच्वंगु दु। पौडेलं सभामुखयात फोन हे यानाः तालिका कथं ज्या याये दइ मखु धयाच्वंगु खँ नं सीदुगु दु ।
