तिक्क मिंगु दु घाःया सः

ज्ञानेन्द्ररत्न वज्राचार्य

समग्र ह्यूपाःया प्रतिक्षा यायां
थौं नेपाःमि बाज्यःवने धुंकल ।
००७ सालनिसें ०६८ साल तकया दुने
थौं नेपाःमि धुसिलुइ धुंकल ।। १ ।।

अथे नं न्हूगु नेपाःया म्हगस झीगु
न्ह्यलय् वा ज्वलय् छु खः ? मस्यूनी !
संविधान सभाया आयू ताःहा जुलं नं
तातुना झीगु अझं थौं पूमवंनी ! ।। २ ।।

संविधान सभाया स्वां हृवःगु स्वस्वं
सत्ता भागबण्डाया कासा जुल ?
६०१ म्ह सभासद धाःपिं थौं
जोकर फाल्टो न्हृयवःसा जुल ? ।। ३ ।।

ई खुसि न्ह्यानाच्वंतले थन
देय् भिंकेगु च्यूता सुइकें मदु !
सत्ता लिप्साया जाः ग्वयाच्वंपिंके
देय् कंगाल हे जूसां मूताः मरु ! ।। ४ ।।

संघीयता, स्वायत्तता व स्वशासन फुकं
थिंग दनाच्वंम्ह झ्वाता थें जुल ?
उत्पीडन व विभेदया मतभेद फुक्कं
सुपाचं भुंगु हाकुगु न्हि थें जुल ? ।। ५ ।।

सकल नेपाःमिया दुघाःया म्ये थौं
किसिया न्हाय्पनय् पति हाले थें जुल !
न्हूगु नेपाःया ल्वःवंगु, हिसिदुगु ख्वाःपाः
निर्लज्जया हाकःभ्याः क्यू थें तुच्छ जुल ! ।। ६ ।।

थःकतः, कतःथःया ल्वापुं थौं
नेपाःमिया अस्मिताय् न्हृयसःचिं थ्वइच्वन ?
परदेशया तुंक गिद्ध मिखां थौं
नेपाःया भूमिइ लबः कायेत स्वइच्वन ? ।। ७ ।।

संन्ह्यलं झी दनेधुनागु खःसा
सचेतताया गं न्यंकं न्यायेकेनु ।
नेपाःमि सकसितं जुरुजारुं थनाः
मंकाःगु, स्यल्लाःगु थां धस्वाकेनु ।। ८ ।।

Related Stories

जागीरदार ?

More Stories Like this

मांया ख्वाः स्वये
नेवाः हाइकु निलापौ
नेवाः हाइकु निलापौ
नेवाः हाइकु निलापौ
नेवाः हाइकु निलापौ