नेवाः स्वायत्त राज्य विरोधीतय्‌त खबरदारी

संविधानसभापाखें न्हूगु संविधान निर्माण यायेगु इलय् नेवाः स्वयात्त राज्य मबिकेगु कुतः कथं खस ब्रम्हुत छप्पँ जुयाः च्वंगु इलय् नेवातय्सं थःगु शक्ति प्रदर्शन यात । निदँ न्ह्यः निसें हनावयाच्वंगु नेवाः एकता दिवसया लसताय् येँया चकंदबुली जूगु ज्याझ्वलय् नेवाःतय्सं संघीयता नापं नेवाः स्वयात्त राज्य विरोधीतय्त खबरदारी याःगु खः ।

नेवाः स्वायत्त राज्य मंकाः संघर्ष समितिया ग्वसालय् जूगु विशाल सभाय् नेवाः नेतातय्सं न्हूगु संविधानय् नेवाः स्वायत्त राज्य मवसाः संविधान जारी याःगु न्हि खुन्हु हे संविधानसभा पिने न्हूगु संविधान च्याकेगु ख्याच्वः बिउसें नेवाः स्वायत्त राज्य मवतल्ले थःपिनिगु संघर्ष निरन्तर जारी जुइगु खँ धाःगु खः ।

सभायात सम्बोधन यानादिसें प्रोफेसर माणिकलाल श्रेष्ठं नेपाःया फुक्कं राज संस्थात सामन्ति जूसां शाह जुजुत सामन्ति नापं जाति, भाषा व संस्कृतियात क्वत्यःपिं महासामन्त जूगु धयादिल । वय्कलं पृथ्वीनारायण शाहं नेपाः एकीकरण याये न्ह्यः नेपाः व जर्मनया आर्थिक व सामाजिक अवस्था छगू हे जूसां निसः दँ लिपा नेपाः व जर्मनया अवस्थाय् आकाश जमीन पाःगु धयादिल । वय्कलं जातिय राज्य बारे जुयाच्वंगु मखूगु प्रचारया बारे नं ध्वाथुइकादीगु खः ।

नेपाली कांग्रेसया सभासद् तीर्थराम डंगोलं नेवाः स्वयात्त राज्य उलि अःपुक्क मवइगु धयादिसें न्हापा लिपाया परिवर्तनय् थें नेवाःत छेँखाः छेँखाः, त्वाः त्वालं कुहांवयेमाःगु धयादिल । वय्कलं नेवाःतय् थःगु हे बिस्कं पहिचान दुगुलिं थःपिनिगु पहिचानया आधारय् नेवाः स्वायत्त राज्य पलिस्था यायेमाःगु धयादिल ।

संसारय् न्ह्याथाय् नं राज्य पुनर्संरचना यायेगु इलय् अनया जाति, भाषा, संस्कृति, इतिहास नापं सामर्थ्ययात महत्व बिइगु धयादिसें नेपालय् नं उगु हे कथं पुनर्संरचना यायेमाःगु धयादिल ।

नेवाः जागरण मञ्चया नायः सुजीव बज्राचार्यं नेवाः स्वायत्त राज्य मबीकेगुलिं थीथी थासं पहल जुयाच्वंगु धयादिसें नेवाः स्वायत्त राज्य न्हूगु संविधानय् घोषणा मजूसाः नेवाःतय् संघर्ष अझ निरन्तर जुयाच्वनीगु धयादिल ।

जनस्तरं नेवाः स्वायत्त राज्य घोषणा जूगु न्हि कथं हंगु नेवाः एकता दिवसय् ज्यापु महागुथीया अनुप सिं सुवालं लसकुस यानादीगु खःसा संघर्ष समितिया नायः नरेशवीर शाक्वं सुभाय् बियादीगु खः ।

सभाय् नेवाः जाति दुनेया थीथी खलः पुचःया प्रतिनिधितय्सं नेवाः स्वायत्त राज्य मबीइगु षड्यन्त्रया खबरदारी यासें नेवाः स्वायत्त राज्य घोषणा मजुतल्ले निरन्तर संघर्ष यानाच्वनेगु मंकाः प्रतिबद्धता प्वंकूगु खः ।

सभा स्वयां न्ह्यः येँया बसन्तपुली, लैनचौर, त्रिपुरेश्वर, यलया पुच्वः, यल ध्वाका लगायत थासं द्वलंद्वः नेवाःतय् र्‍याली पिहांवःगु खः । सभा न्ह्यः चकंदबुली सांस्कृति ज्याझ्वः नं जूगु खः ।

More Stories Like this