नेवाः एकता दिवस छाय् ?
झिगू घटकया धापू
थौं न्यायेकाच्वंगु नेवाः एकता दिवसयात कयाः नेवाः स्वायत्त राज्य मंकाः संघर्ष समितिइ दुथ्याःगु झिगू घटकया प्रतिनिधितय् बिचाः
नरेशवीर शाक्य (नेवाः ल्यायम्ह न्ह्यलुवाः) :
न्हूगु संविधान निर्माण जूवनाच्वंगु इलय् जातीय पहिचान सहितया राज्य नेवाःतय्त माः धकाः सः थ्वयेकेत थ्व दिवस हनेमाःगु खः। भाषिक नापं जातीय समानताया नितिं नेवाः स्वायत्त राज्य सुनिश्चितता यायेत नेवाः शक्ति प्रदर्शन जुइ ।
नरेश ताम्राकार (नेवाः देय् दबू) :
तत्कालिन शासकतय्सं यानातःगु नेवाः दुनेया विभेद् अत्य जुल धकाः घोषणा यायेगु, नेवाःत छप्पँ छधी जुल धकाः सन्देश बीगु नापं नेवाः राज्यया नितिं सकल नेवाःत छप्पँ जुया वल धकाः सन्देश बीगु ज्या जुइ। न्हूगु संविधान निर्माण जूवनाच्वंगु इलय् नेवाः स्वायत्त राज्यया नितिं ठिक इलय् ठिक ज्याझ्वः जूवनाच्वंगु दु ।
अनुपसिंह सुवाल (ज्यापु महागुथि) :
नेपाल मण्डल लागाय् नेवाः स्वायत्त राज्यया नितिं नेवाःतय्सं नेवाः स्वायत्त राज्य घोषणा याःगु दिंया लुमन्तिइ थुगु दिवस जूवनाच्वंगु दु। नेवाः स्वायत्त राज्य विरोधीतय्त खबरदारी यायेगु नापं नेवाः एकता क्यनेगु ज्या जूवनाच्वंगु दु ।
राजेश शाक्य (बौद्ध विहार संघ) :
संविधानय् नेवाः स्वायत्त राज्य सुनिश्चित यायेगु नितिं दबाव बीगु जुइ। नेवाः राज्यया महत्वयात नं दिवसं नेवाःतय्त थुइकेगु ज्या जुइ ।
गजेन्द्र मानन्धर (लोकतान्त्रिक नेवाः दबू) :
नेवाःतय्गु पहिचान न्ह्यब्वइगु कथंया नेवाः राज्य प्राप्तिया नितिं नेवाः एकता दिवस हनाच्वंगु खः। आर्थिक, सांस्कृतिक ख्यलय् नं नेवाःतय्गु अधिकार सुनिश्चित यायेत नापं थःपिनिगु निंतिं थःपिंसं हे निर्णय यायेगु अधिकारया निंतिं नेवाः स्वायत्त राज्य हयेत नेवाः एकता दिवस हनाच्वंगु खः ।
दिलबहादुर श्रेष्ठ (एकीकृत नेवाः राष्ट्रिय मुक्ति मोर्चा) :
नेवाःतय्गु नितिं नेवाःतय्सं हे कानून निर्माण यायेगु अधिकार नेवाः स्वायत्त राज्यय् दइ। उकिया नितिं नेवाःतय्त जागरण ब्वलंकेत अले फुक्क कथंया विभेदयात अन्त्य यानाः समानताया नितिं सः थ्वयेकेत नेवाः एकता दिवस जूवनाच्वंगु खः ।
सुजिव बज्राचार्य (नेवाः जागरण मञ्च) :
नेवाः आन्दोलनयात सशक्त कथं न्ह्याकेत नेवाः एकता दिवस हनाच्वंगु खः। नेवाः विरोधीतय्त खबरदारी यायेत, नेवाः शक्ति क्यनेत नापं पार्टीइ दुने च्वनाच्वंपिं नेवाःतय्सं नेवाः स्वायत्त राज्य सुनिश्चित यायेगु ज्याय् दलत मवन धाःसा पार्टी दुने नं विद्रोह यायेफु धकाः संकेत बी ।
डा. चुन्दा बज्राचार्य (नेवाः देय्गुथि नेपाल मण्डल) :
राजनीतिक हक अधिकार प्राप्ति यायेगु नितिं। राज्य पुनर्संचना आयोगंनिसें दलया नेतातय्त दवाव बीगु नितिं नेवाः एकता दिवस खः ।
कृष्णबहादुर घःजु (नेवाः लोकतान्त्रिक नेवाः संघ) :
नेवाः राज्यया आन्दोलनया रुपय् नेवाः एकता दिवस खः। नेवाः राज्यया नितिं सम्बन्धित पक्षयात दबाव बीत नापं नेवाः एकता क्यनेत खः ।
मंगल महर्जन (ज्यापु समाज यल) :
नेवाःतय्गु नितिं राजनीतिक नापं एतिहासिक दिं खः नेवाः एकता दिवस। एकता दिवस छगू कथं शक्ति प्रदर्शन खः। राज्य पुनर्संरचना पहिचान व सामर्थ्यया आधारय् यायेमाःगु नापं नेवाःतय्गु निंतिं राजनीतिक लबः कायेगु निंतिं थ्व दिवस हनेत्यनागु खः ।
