देय् दबूया राष्ट्रिय सम्मेलन

नेवाःतय् राष्ट्रिय संगठन नेवाः देय् दबूया निन्हुयंकं जूगु राष्ट्रिय् मुँज्या थीथी निर्णय यासें क्वचाल। सिद्धार्थ बनस्थली स्कूलया सभाहलय् देय् दबूया नायः नरेश ताम्राकारया सभापतित्वय् जूगु उगु ज्याझ्वः नायः नापं संरक्षकपिं लक्ष्मण राजबंशी व मल्ल के.सुन्दर स्वम्हेसिनं स्वंगः हे सुकुन्दा च्याकाः उलेज्या जूगु खः।
मूछ्यांज्ये रजनी महर्जनं लसकुस यासें नेवाः स्वायत्त राज्यया निंतिं नेवाःतय्सं यानाच्वंगु संघर्षयात जिल्लां वयाच्वंपिं प्रतिनिधिपिंसं नं तिबः बीत आग्रह यानादिल।
ज्यझ्वलय् थःगु बिचाः प्वंकेगु झ्वलय् एकिकृत माओवादीया सभासद नापं पुलांम्ह मन्त्री हिसिला यमिं यदि आःया इलय् नं नेवाःत छप्पँ जुयाः दने मफुत धाःसा अझ सच्छि दँ लिपा नं स्वायत्त राज्य हये फइ मखु धयादिल।
नेपाली कांग्रेसया सभासद ध्यानगोविन्द रञ्जीतं थःत न्हापां कांग्रेस जुयाः म्हसीकेगु व लिपा जक नेवाः जुयाः म्हसीके धयादिल। एमालेया सभासद् डा. मंगलसिद्धि मानन्धरं थःत बुइकूम्ह मां नेवाः जुयाः थःत न्हापां नेवाः धकाः म्हसीका बियाः लिपा जक एमाले व मेमेगु जुइ धयादिल। वय्कलं नेवाःतय्त न्हापां थःगु पहिचान माः अले जक अग्रधिकारया खँ जुइ धासें आदिवासी जनजाति सहित नेवाःतय्सं थःगु माग व अडान बल्लाका वनेमाःगु खँ कनादिल।
देय् दबूया संरक्षक लक्ष्मण राजवंशीं नियम कानून क्वातुसा जक संस्था बल्लाइ धासें आः वइगु संविधान हाकनं हिलेम्वाःलीगु कथंया जुइमाःगु खँ कनादिल।
ज्याझ्वःया निगूगु ब्वय् दबूया संरक्षक मल्ल के. सुन्दरं 'समसामयिक राजनीतिक अवस्था व नेवाः आन्दोलन' विषयय् प्रशिक्षण बियादीगु खः। घौछितकया प्रशिक्षणय् वय्कलं संघीय प्रणाली, स्वायत्त राज्य, नेवाः स्वायत्त प्रदेश, राज्य शक्तिया बाँडफाँड, अधिकार व श्रोतया बाँडफाँड, आत्म निर्णयया अधिकार आदि विषयय् ध्वाथुइकादीगु खः।
प्रशिक्षण लिपा सहभागीपिं मध्ये रजनी मल्ली, प्रा. लक्ष्मी देबभण्डारी चितवन, हिरालाल शाक्य भोजपुर, सुशीला शाक्य यल, अमर श्रेष्ठ सप्तरी, गोविन्द श्रेष्ठ सुनसरी, सरोज शाक्य येँ, शारदा प्रधान इलाम, दुर्गालाल सिलाकार यल, बसन्त श्रेष्ठ धरानपिंसं थीथी जिज्ञासा प्वंकादीगु खः।
ज्याझ्वःया स्वंगूगु ब्वय् सभानायःयापाखें देय् दबूया संशोधित विधान न्ह्यब्वयादीगु खः। विधान बारे सहलह यायेत सहभागीपिंत न्यागू पुचलय् ब्वथलेगु ज्या जूगु खः। तर सहभागीपिं मध्ये सानुराजा शाक्य, किरण शाक्य व नरेशवीर शाक्यपिंसं विधान पारित यायेगु खँय् आपत्ति प्वंकुसें समूहगत छलफल मयायेत इनाप यानादिल। न्हूगु तयारी विधान पोखरा व धनकुटाय् पास मजूगु व आः संशोधन जुयावःगु विषयय् थःपिंत जानकारी मदु धासें नायः सहितया कमिटी दयेकाः उगु कमिटीं बिउगु प्रतिवेदनय् सहलह यानाः जक विधान पारित यायेत वय्कःपिंसं इनाप यानादिल। थुकिं यानाः विधान बारे सहलह यायेगु वा मयायेगु धइगु खँय् छझाः अन्यौल ब्वलन। लिपा संरक्षक मल्ल के. सुन्दरं विधान संशोधन यायेगु अधिकार महाधिवेशनयात जक दुगु जुयाः थ्व मुँज्यां पुलांगु विधान परिमार्जन यायेत सहलह जक यायेगु खः धासें सहलह याके बीगु ज्या न्ह्याकल।
लिपांगु न्हि पोहेलाया पारु कुन्हु न्हापांगु चरणया ज्याझ्वलय् नेकपा (एमाले)या नेता लिसें संघीयताविद् राजेन्द्र श्रेष्ठं संघीयता व नेवाः राज्यया विषयय् प्रशिक्षण बियादिल। वय्कलं संघीय राज्य, एकात्मक राज्यया संरचना, पहिचान व सामर्थ्यया स्वापू, नेवाः राज्यया तहगत संरचना नेवाः प्रदेशं पिनेया नेवाःतय्गु अधिकार, जातीय राज्यया सार्थकता लगायतया विषयय् ध्वाथुइकादीगु खः। उकी नं थीथी सहभागीपिंसं जिज्ञासा प्वंकादीगु खः।
निगूगु चरण ज्याझ्वःया सुरुवातय् नांजाःम्ह गायक रामकृष्ण दुवालं निपु जागरण म्येँ हालाः न्यंकादिल।
वयां लिपा विधान संशोधनया विषयय् सहलह सुरु जुल। तर उकी पुचः मुनाः सहलह मजुसे व्यक्तिगत रुपं फ्लोरं हे थःथःगु बिचाः प्वंकेगु ज्या जूगु खः। उकी सानुराजा शाक्य, न्हुच्छेकाजी महर्जन, नरेश कुमार शाक्य, देवदास मानन्धर, इन्द्रबहादुर, मनरत्न शाक्य, काजीलाल श्रेष्ठ, विश्वनाथ लगायतपिंसं थःथःगु छ्याता बियादिल।
दकलय् लिपा न्याम्ह दुजः सहितया विधान संशोधन समिति नीस्वनाः माःगु कथं सहलह यानाःलि जक उगु विधान महाधिवेशनय् पेश यायेगु निर्णय जुल। दांभरी विजयरत्न बज्राचार्यं आर्थिक प्रतिवेदन, मूछ्यांज्ये रजनी महर्जनं बार्षिक प्रतिवेदन न्ह्यब्वयादिलसा विजय प्रकाश तण्डुकारं सुभाय् बियादिल। उगु राष्ट्रिय मुँज्याय् देय् दबूया देय्न्यंकंया १६० गू कचां ब्वति काःगु खः।

More Stories Like this