परम्परागत वसःया फेशन शो
येँ(सन्ध्या टाइम्स)/ब्लू रेन फेशन जोनया ग्वसालय् ट्रेडिसनल फेसन शो २०११ राष्ट्रिय नाचघरय् वंगु शुक्रवाः जुल। मुक्कं झिंस्वम्ह मय्जुपिंसं ब्वति काःगु उगु ज्याझ्वलय् अनु शाही, रुविस्ता मानन्धर, निशा महर्जन, रसना प्रधान, निशा जोशी लगायतं थीथी जातिया फेशन न्ह्यब्वःगु खः।
वरिष्ठ संगीतकार जीवनलाल मास्के मूपाहांकथं झाःगु उगु ज्याझ्वलय् गायिका देवी थापाया एल्बम 'सपना' या उलेज्या नं जूगु खः। सनोजराज वैद्य व अनुष्का बलामीं व्यवस्थापन यानादीगु उगु ज्याझ्वःया कोरियोग्राफी क्षितिज श्रेष्ठं यानादीगु खः। तना वनेत्यंगु नेपाःया थीथी जनजातिया परम्परागत वसः संरक्षण यायेगु ताः तयाः थज्याःगु 'ट्रेडिशनल फेशन शो' याना वयाच्वनागु खँ ग्वसाः खलकं धाःगु दु। ज्याझ्वःया दथुइ थीथी म्येँ व हुलाप्याखं नं न्ह्यब्वःगु खः।
