न्हय्क्वःगु ज्ञानमाला सम्मेलन
किपू(सन्ध्या टाइम्स)/न्हय्क्वःगु राष्ट्रिय ज्ञानमाला सम्मेलन वंगु शनिवाःनिसें न्ह्यात। मूपाहां संघ नायक भिक्षु अश्वघोष महास्थवीरं झ्वाःमत च्याकाः ज्याझ्वःया उलेज्या यानाबिज्याःगु खः। लिसें वसपोलं किपू देय् चाःहिउगु शान्ति पदयात्रा नं बौद्ध ध्वाँय् ब्वयेकाः उलेज्या यानाबिज्याःगु खः।
किपूया ज्याथम्ह भाजु भक्तबहादुर महर्जनयात हनेगु ज्या नं जूगु उगु ज्याझ्वलय् राष्ट्रिय ज्ञानमाला समितिया दुजः अमीररत्न शाक्यं राष्ट्रिय ज्ञानमाला सम्मेलनया प्रतिवेदन न्ह्यब्वयादीगु खः। लसकुस म्येँ हालाः सुरु जूगु उगु ज्याझ्वलय् झिंखुगू ज्ञानमाला भजन खलकं थःथःगु भजन नं न्ह्यब्वःगु खः।
ग्वसाः खलःया नायः सुवर्ण शाक्यया सभापतित्वय् न्ह्याःगु उगु ज्याझ्वलय् दुजः जुलुम शाक्यं लसकुस यानादीगु खःसा व्यवस्थापन समितिया नायः श्रीकृष्ण महर्जनं सुभाय् न्वचु बियादीगु खः।
म्हिगः निन्हुया न्हि सुथय् भजन ज्याझ्वः नं न्ह्याःगु खःसा ज्याझ्वःया निगूगु चरणय् दुजः वीरेन्द्र श्रेष्ठं 'बुद्धया उपदेश प्रचार प्रसारय् ज्ञानमालाया योगदान' विषयक ज्यापौ न्ह्यब्वयादीगु खःसा भूषण शाक्यं उकी टिप्पणी यानादीगु खः। अथे हे थौं (सोमवाः) बन्द सत्रलिसें ज्याझ्वः क्वचायेकीगु ग्वसाः दु।
