स्वनिगः थौं नं ख्वाउँ

येँ(सन्ध्या टाइम्स)/थौं चान्हय् वःगु वां यानाः स्वनिगःया तापक्रम स्वात्त हे कुहां वंगु दु। चान्हय् वा वः थें थौं न्हिनय् नं सामान्य वा वःगु खः। म्हिगः न्हिछि निभाः मत्वःगु खःसा थौं नं मौसम म्हिगः थें हे जुइफुगु अनुमान मौसमविद्तय्सं याःगु दु।
येँया जनबाहाःद्यःया न्हवं जुल कि स्वनिगःया मौसम ख्वाउँसे च्वनी अथवा वा हे वइ धइगु पुलांपिं मनूतय् धापू धाःसा थुगुसी नं सार्थक जूगु खने दत। म्हिगः जनबाहालय् लः, दुरु आदिं जनबाहाःद्यःयात म्वःल्हुकाः न्हवं याःगु खः।
उखे ख्वाउँयाः च्वापु खने दयेवं स्वनिगःया आपालं मनूत यलया फूच्वपाखे म्हितः वंगु दु।