कांग्रेस अडानं बैठक हानं निष्कर्षहिन
येँ(सन्ध्या टाइम्स)/थौं सुथय् च्वंगु प्रमुख स्वंगू दलया शीर्ष नेतातय्गु बैठक बिनानिष्कर्ष क्वचाल। राज्यया शासकीय स्वरुप बारे सहमति यायेत माओवादी, नेपाली कांग्रेस व एमालेया शीर्ष नेतातय् बैठक च्वंगु खः।
बैठकय् सहमति मजुइवं आः हाकनं थौं हे संवैधानिक समितिया बैठक च्वनीगु जूगु दु। म्हिगः नं उपसमितिया बैठक च्वंगु इलय् नेतातय् दथुइ विवाद जूगुलिं थौं सुथय् स्वंगू दलया शीर्ष नेतातय्गु दथुइ बैठक च्वनाः जक उपसमितिया बैठक च्वनेगु सहमति जूगु खः।
संविधानसभाया संवैधानिक समिति अन्तर्गतया उपसमितिया बैठकय् सहमति जुइधुंकूगु विषययात कयाः थौं च्वंगु प्रमुख दलया शीर्ष नेतातय्गु बैठकय् नेपाली कांग्रेस लिचिलेवं बैठक विना निष्कर्ष क्वचाःगु खँ धाःगु दु।
कांग्रेसया उपनेता नापं महामन्त्री प्रकाशमान सिंह सहभागी जुयादीगु उपसमितिया बैठकं प्रत्यक्ष निर्वाचित राष्ट्रपति व संसदं प्रधानमन्त्री ल्ययेगु धकाः सहमति जुइधुंकूगु खःसा थौं कांग्रेसया नेतातय्सं थःपिंसं संसदीया प्रणालीयात त्वःते फइ मखु धकाः अडान काःगुलिं हाकनं विवाद तच्वःगु खँ नेतातय्सं जानकारी बियादीगु दु। कांग्रेसं कार्यकारी अधिकार सहितया प्रधानमन्त्री अले सेरेमोनियल राष्ट्रपति दयेकेमाःगु अडान तःगु खः।
