थौं नेवाः एकता दिवस तःजिक हन
- लखौं नेवाःत सतकय् कुहां वयाः शक्ति प्रदर्शन
- राजधानी प्रदेश स्वीकार मयायेगु जातीय खलःपुचःपाखें प्रतिवद्धता
येँ (सन्ध्या टाइम्स)/जनस्तरं नेवाः स्वायत्त राज्य घोषणा जूगु ऐतिहासिक दिंया लुमंतिइ थौं नेवाः स्वायत्त राज्य मंकाः संघर्ष समितिया ग्वसालय् निक्वःगु नेवाः एकता दिवस शक्ति प्रदर्शनया रुपय् जूवनाच्वंगु दु। येँया तिंख्यः चकंदबुली विशेष समारोह यानाः जुइगु नेवाः एकता दिवसय् ब्वति कायेत स्वनिगः नापं स्वनिगः जःखः च्वंगु नेवाः वस्तीया नेवाःत थःथःगु खलः पुचःया ब्यानर नापं ज्वनाः जुलुस पिकाःगु दु। समारोहय् नेवाः स्वायत्त राज्य मंकाः संघर्ष समितिया सल्लाहकारपिं प्रा. माणिकलाल श्रेष्ठ व सांसद् तिर्थराम डंगोलं मू वक्ता कथं न्ववानादी। उगु नेवाः एकता दिवस समारोहय् उपस्थित जुइगु नितिं मंकाः संघर्ष समितिया थीथी घटक, येँया खलः पुचःया नेवाःत बसन्तपुली मुनाः तःजिक जुलुस पिकाःगु दु। अथे हे ज्यापु महागुथिया नेतृत्वय् लुँहितिइ मुनाः जुलुस पिहां वःगु दु। लुँहितिइ येँया ज्यापुत नापं येँनं दक्षिण पश्चिम लागाया ज्यापुतय्गु नं उपस्थिति दुगु खः ।
अथे हे यल ध्वाखा लागां ज्यापु समाज यलया जुलुस पिकाःगु दु। यलया पूच्वं यलया बौद्ध विहार संघ, यल उपमनपाया पुलांपिं जनप्रतिनिधितय्गु ककस नापं थीथी खलः पुचः मुनाः जुलुस पिकाःगु दु। लैनचौरय् तोखा, धापासी, नयाँबजार, ग्वंगःबुँ व उत्तरी लागाया नेवाःतय्गु जुलुस पिहां वःगु दु। भ्वत, धौख्यः, ख्वप, थिमिया नेवाःत त्रिपुरेश्वरय् मुनाः जुलुस पिकाःगु दु ।
चक्कं दबुली जुइगु ज्याझ्वलय् नेवाःतय् फुक्कं जातीय खलः पुचःतय्सं यदि नेवाः राज्ययात राजधानी प्रदेश दयेकाः संविधान जारी यात धाःसा उकियात विरूद्ध आन्दोलन यायेगु प्रतिवद्धता प्वंकीगु ग्वसाः दु ।
छेँ थुंगुया विरोध
सभाय् थौंकन्हय् येँया थीथी लागाय् सतक विस्तारया नामय् स्थानीय नेवाःतय् छेँ थुनाच्वंगु विरोधय् नं संवोधन जुइ धाःगु दु।
