पंचायती कानून छ्यलाः लँ तबाला यायेगु ज्या

आपालं नेवाःतय् छेँ थुना बिल

येँ (सन्ध्या टाइम्स)/अप्वयाच्वंगु ट्राफिक जामयात व्यवस्थित यायेगु नामय् सरकारं राजधानीया थीथी थासय् सतक तब्या यायेत सतकया जःखः च्वंगु छेँ थुनेगु सुरु यायेवं उकिं यानाः आपालं नेवाः लगायत स्थानीय मनूत छेँबुँविहिन जुइफुगु खँयात ध्यानय् तयाः थाय्थासय् विरोध सुरु जूगु दु। सरकारं लँ तब्या यायेगु धकाः किटान याना तःगु गुलिखे थासय् ला स्थानीय जनतां संघर्ष समिति हे गठन यानाः सरकारया उगु ज्याया प्रतिकार यायेगु समेत तयारी याःगु दु ।

थ्वहे झ्वलय् येँया बालाजु लागाय् नं लँ तबाला यायेगु धकाः सडक विभागं अन जःखः च्वंगु छेँय् चिं तया थकेवं स्थानीय जनता आतंकित जूगु दु। म्हीग अन स्थानीय मनूत पिहां वयाः जुलुस समेत पिदंगु खःसा म्हिगः थीथी पार्टीया मनूत सःताः थ्व बारे बिचाः ब्याकेगु ज्या नं यात। उगु सहलहय् ब्वति कयादीम्ह नेपाः राष्ट्रिय पार्टीया नायः डा. केशवमान शाक्यं लँ तबाला यायेगु नेवाःतय्गु आवश्यकता मखु, तर लँ तबाला यायेगु नामय् आपालं स्थानीय नेवाःतय्त मर्काय् लाकेत्यंगु प्रतिक्रिया बियादिल। लिसें वय्कलं यदि लँ हे माःगु हे खः धइगु खःसा अन मेमेगु थासं लँ दयेकेगु विकल्प दयेक दयेक नं नेवाःतय् मूलवस्ती दुनें हे लँ तबाला यायेत्यंगु पूर्वाग्रही खनेदुगु बिचाः नं कनादिल ।

उखे बाँसबारी लागाय् नं २०३३ सालया पञ्चायतकालीन कानून पुइकाः थौंया लोकतन्त्रय् जनताया छेँ हड्पे याये दइ मखु धकाः प्रतिकार समिति हे गठन याःगु दु। स्वनिलय् लँ दयेकेत न्हापांनिसें जग्गा त्वःता वयाच्वंपिं स्थानीय नेवाःत हे खः। राणाकाल व पञ्चायतकालय् ख्यानाः नेवाःतय् जग्गा कब्जा यानाः लँ लबाला याःगु खःसा थौं लोकतन्त्रय् ला झन् उठिबास हे यायेत्यंगु खनाः स्थानीय नेवाःत आक्रोशित जूगु दु ।