कन्हय् नेवाः एकता दिवस
थौं असनं सिट्ठी पुयाः जुलुस
येँ (सन्ध्या टाइम्स)/कन्हय् तःजिक न्यायेकेत्यंगु नेवाः एकता दिवसया प्रचार यायेगु झ्वलय् थौं येँय् सिठ्ठी पुयाः जुलुस पिकाइगु जूगु दु। थौं सनिलया ४ बजे असनं उगु जुलुस पिहां वइ। उगु जुलुसं कन्हय् पसः बजाः बन्द यानाः खुलामञ्चय् जुइगु सभाय् ब्वति कायेत सकलें व्यवसायीतय्त इनाप यासें दुने लागाया त्वाःबाहाः चाःहिली ।
उखे यलय् यल उपमनपाया पुलांपिं जनप्रतिनिधितय् ककसं थौं यल देय् चाःहिलाः कन्हय्या ज्याझ्वलय् ब्वति कायेत इनाप याइ। थ्वहे ज्याया लागिं म्हिगः किपुली नं पुलांपिं जनप्रतिनिधितय् ककस गठन याःगु दु।
कन्हय् खुलामञ्चय् निगू चरणया ज्याझ्वः याइगु ग्वसाः दु। न्हापांगु चरणय् सांस्कृतिक ज्याझ्वः जुइसा लिपांगु चरणय् थीथी नेवाः व्यक्तित्वपिंपाखें न्वचु व थीथी जातीय खलः पुचःपाखें राजधानी प्रदेशया विरोध यासें नेवाः स्वायत्त राज्य हे माः धासें मंकाः प्रतिवद्धता प्वंकेगु ज्या जुइ ।
