युवा संघया ल्वापुइ गोली प्रहार
येँ (सन्ध्या टाइम्स)/अपराधी सुचुकेत ताःलाःगुलिं एमालेया '३ नम्बर नेता' खड्ग ओलीं स्याबासी बियातःगु युवा संघ दुने आन्तरिक कचवंया कारणं म्हिगः गोलीं कयेकाः ल्वापु जुल। युवा संघ येँ ७ नम्बर क्षेत्रया चुनाव म्हिगः थनया नयाँ बजार लागाय् जूगु खः। चुनावय् फुर्वा तामाङ व जोग गुरुङ दथुइ धेंधेंबल्लाः जूगु जुयाच्वन। चुनाव लिपा गुरुङ त्यायेवं फुर्वा तामाङं ब्यागय् तयातःगु चाइनिज पेस्तोल लिकयाः स्वंगू राउण्ड हवाई फायर यात। उकिं सुं घाःपाः मजूसां तामाङ धाःसा बिसिउँ वंगु दु। ल्वापु मिले यायेत सघंया नायः महेश बस्नेत थः हे सक्रिय जूसां खँ मिले मजुसेंलि चुनाव यायेमाःगु खः ।
