नेवाः एकता दिवस तःजिक सफल याये

नेवाःतय्सं थःपिनि भाषिक व जातीय माग पूवंकेगु झ्वलय् दशकौं न्ह्यवंनिसें याना वयाच्वंगु आन्दोलनत मध्ये दकलय् उच्चतम विन्दुइ थ्यंगु आन्दोलन खः थनिं निदँ न्ह्यः येँया दशरथ रंगशालाय् जूगु नेवाः स्वायत्त राज्य घोषणाया ज्याझ्वः। न्ह्याबलें सत्तायाके फ्वनेगु जक ज्या याना वयाच्वंपिं नेवाःतय्सं वकुन्हु सत्तायाके फ्वनेगु त्वःताः थःपिं हे सत्ताय् वनेगु उद्घोष सहित नेवाः स्वायत्त राज्य पलिस्था जूगु स्वघोषणा याःगु खः। आः देय्न्यंकंया नेवाःत थ्वहे छगू बुँदाया माग ज्वनाः न्ह्याः वनाच्वंगु दुसा आः जुइगु नेवाः आन्दोलनया छगूयां छगू जक लक्ष्य धइगु नं थ्वहे खः। नेवाः स्वायत्त राज्य पलिस्था यायेगु थ्व उच्चतम आन्दोलनया स्पिरिटयात उर्जावान याना तयेगु लागिं नेवाःतय् सम्पूर्ण खलः पुचः जानाः स्वना तःगु नेवाः स्वायत्त राज्य मंकाः संघर्ष समितिं दँय्दसं उगु न्हिया लुमंति कथं "नेवाः एकता दिवस" हनेगु याना वयाच्वंगु दु। तिथि कन्हय् पुस १८ गते उगु न्हि हनेत्यंगु दु। कन्हय् येँया खुलामञ्चय् छगू तःजिगु ज्याझ्वः यासें थ्व दिवस हनेगु तयारी यानाच्वंगु दु। कन्हय्या ज्याझ्वः वास्तवय् निदँ न्ह्यः जूगु घोषणासभाया लुमंति जक मखु। थ्व थौंया इलय् यायेमाःगु छगू सान्दर्भिक शक्ति प्रदर्शन नं खः। देशय् न्हूगु संविधान दयेकेगु ज्या न्ह्यानाच्वंगु हे इलय् छखे संघीय व्यवस्थाया विरोधीत सक्रिय जुया वःगु दुसा मेखे संघीयताया पक्षधरतय्सं नं न्हूगु नेपाः दुने नेवाःतय्त स्वायत्त प्रदेश मबीगु षडयन्त्र म्हिताच्वंगु दु। थज्याःगु जालझेलयात ख्याच्वः बीगु निंतिं नं कन्हय् याइगु तःजिगु ज्याझ्वःयात सकलें नेवाःत जानाः सफल यायेमाः। उकिया सफलता सकलें नेवाःतय् सफलता खः ।

More Stories Like this