पलिस्था चिनाखँ मुँज्याय् तिकिया फुति पितब्वज्या

पलिस्थाया नीन्याक्वःगु ज्याझ्वः अन्तरगत पलिस्था चिनाखँ मुँज्या ११३२ थौं येँया जगतसुन्दर ब्वनेक्रथिइ जुल ।

कवि योगेन्द्र प्रधानया सभाध्यक्षताय् जूगु उगु ज्याझ्वलय् पुलांपिं व न्हूपिं कविपिन्सं चिनाखँया नापनापं गजल व हाइकु नं ब्वना न्यंकादीगु खः । मुँज्याय् डा. केशवमान शाक्य, प्रा. नर्मदेश्वर प्रधान, भूषण प्रसाद श्रेष्ठ, कृष्ण भक्त बोडे, बद्री बेदना, रामेश्वर जलन, नारद बज्राचार्य, ज्यापु जुजु लिसें नीनिम्ह कविपिन्सं थःथःगु चिनाखँ पाठ यानादीगु खः । उगु चिनाखँयात कयाः समालोचक प्रा. माणिकलाल श्रेष्ठं समीक्षा यानादीगु खः ।

थ्वहे झ्वलय् कवि रामभक्त कायस्थजुं च्वयादीगु "तिकिया फुति" हाइकु मुना सफू ज्याझ्वःया मू पाहां कवि डा. आनन्द जोशीं चिखिफ्यनेज्या यानादीगु खः । नापं कवि जोशीं हाइकुया नापनापं सफूया बारे नं थःगु बिचाः प्वंकादीगु खः । सफूया चिखिफ्यनेज्या लिपा च्वमि रामभक्त कायस्थं सफुतिइ दुथ्याःगु हाइकु ब्वना न्यंकादीगु खः ।

More Stories Like this