ल्हातय् दुगु न्यालाया पूवंक सदुपयोग याये

संविधानसभाया म्याद आः थपे याये दइ मखुत धकाः सर्वोच्च अदालतपाखें याःगु फैसलाया कारणं देशय् न्यायपालिका छखे व कार्यपालिका लिसें व्यवस्थापिका मेखे जुयाः न्हूगु कथंया युद्ध सुरु यायेत्यंगु आभास ब्वलंगु दु। संसद व सरकार जानाः न्यायपालिकायात याकःचा लाकेत्यंगु संकेत पिहां वयेवं कानून व्यवसायलिसे स्वापू दुपिं फुक्कं निकायत न्यायालयया रक्षापंक्ति जुयाः दना वयेवं थ्व युद्धया दृश्य खने दया वःगु खः।
सर्वोच्च अदालतं याःगु थ्व फैसलायात संसद व सरकारं व्यवस्थापिकाय् अदालतं याः वःगु हस्तक्षेप धयाच्वंगु दुसा कानून-विद्तय्सं धाःसा थुकियात संविधानया व्याख्या जक खः धयाच्वंगु दु। थ्व झ्वलय् छता खँ छु सत्य खः धाःसां संविधानसभां यदि संविधान दयेके मफुत धाःसा व सर्वोच्चं याःगु 'हस्तक्षेप' या कारणं मखु बरु थःगु हे कारणं जुइ। छाय्धाःसां संविधान दयेकेगु लागिं संविधानसभां छुं ज्या हे याःगु मदुनि। ज्या यायां हे ई मगाःगु खःसा व मेगु हे पक्ष जुल, ज्या हे मयासे ई मगात धया जुइगु केवल बेइमानी जक जुइ। संविधान दयेकेगु लागिं अझ नं न्याला ल्यं दनि। यदि धाथें ज्या यात धाःसा न्यालाया दुने संविधान दयेके मफइगु मखु। उकिं आः राजनीतिक पार्टीत हानं म्याद थपया सुविधा कायेगुपाखे सिबें ल्हातय् दुगु न्यालाया पूरा सदुपयोग यानाः संविधान च्वयेगुपाखे लगे जूसा व दकलय् बांलाःगु पक्ष जुइ। थ्व न्याला तक सरकार गठन, आन्तरिक ल्वापु थेंज्याःगु छुं नं उखेथुखे मयासे सम्पूर्ण शक्ति छ्यलाः लगे जुल धाःसा याउँक हे संविधान तयार जुइफु। मखुसा म्याद न्ह्याक्व थपे याःसां गाइ मखु।

More Stories Like this