कार्यकर्ता ज्वंगुलिं खम्बुवानया बन्द

येँ(सन्ध्या टाइम्स)/वंगु मंसीर १७ गते इटहरीया चौरास्त चोकय् बम तःपिं खम्बुवान संयुक्त जातीय मोर्चाया खुम्ह कार्यकर्तातय्त प्रहरीं वंगु चान्हय् इटहरीइ ज्वंगु दु।
प्रहरीया विशेष पुचलं बम तःगु अभियोगय् खम्बुवान मोर्चाय् आबद्ध जूपिं सुनसरी व मोरङया कार्यकर्तातय्त बिस्फोटक पदार्थ व महत्वपूर्ण भ्वं नापं ज्वंगु खः।
प्रहरीं मोर्चाया अरविन राई, गौतम राई, पुरन चौधरी, विजय कुमार राय, रामचन्द्र खवास व सीता खवासयात ज्वंगु खः। अथे खम्बुवानया कार्यकर्तातय्त ज्वंगुया विरोधय् इटहरीया जतना वस्तीया स्थानीय ल्याय्म्हतय्सं प्रदर्शन यानाः यातायात अबरुद्ध याःगु दु। थः कार्यकर्तायात बिना पूर्जी ज्वंगु धकाः इमिसं थौं यातायात अबरुद्ध याःगु खः।
वंगु मंसिर १७ गते इटहरीया चौरास्त सतकय् तयातःगु बम बिस्फोट जुयाः सुनसरीया तत्कालीन एसपी राजु मानन्धर नापं न्याम्ह घाःपाः जूगु खः। सेनाया बम डिस्पोजल पुचः इलय् हे थ्यंके मफयाः चेकजाँचया झ्वलय् अन बम बिस्फोट जूगु खः।