छगः हे बसं ठक्कर नकाः स्वम्ह स्याना बिल

येँ(सन्ध्या टाइम्स)/पोखरां वीरगंजपाखे वनाच्वंगु छगः रात्रिबसं ठक्कर नकाः तनहुँया जामुने ३ गुणदी लागाय् वंगु चान्हय् स्वम्ह लँजुवाः स्याना बिउगु दु। उकी लानाः अनया ४५ दँया राजन रानाभाट, २३ दँया अनिल रानाभाट व ४२ दँया रेशम रानाभाट सीगु खः।
दुर्घटना जुइवं उद्धार यानाः अस्पताल यंकूम्ह अनिल मणिपाल अस्पतालय् वासः याकाः लिहां वयाच्वंगु इलय् सीगु खःसा राजनयात पोखरा व रेशमयात येँपाखे यंकाच्वंगु इलय् लँ दथुइ हे सीगु खः। मेम्ह घाःपाः जूम्ह अस्मित रानाभाटयात दमौलीया रत्नहरी मेमोरियल अस्पतालय् वासः याकाच्वंगु दु। वयागु अवस्था चिन्तामुक्त दुगु खँ चिकित्सकतय्सं धाःगु दु। लँय् न्यासि वयाच्वंपिं थुपिं फुकसितं ना. ४ ख ६११७ नम्बरया बसं ठक्कर नकूगु खः। बसयात प्रहरीं ज्वंगु दुसां चालक धाःसा बिसिउँ वंगु दु।
तसकं ब्वाका हःगु बस अनियन्त्रित जुयाः थ्व लँजुवाःतय्त ठक्कर नकःवंगु खः।
घटना लिपा उकिं पीडित जूपिं छेँजःपिंत क्षतिपूर्ति बीमाःगु व चालकयात ज्वनाः कारवाही यायेमाःगु माग यासें स्थानीयवासीं चान्हय् हे ६ घण्टा तक पृथ्वी बन्द याना बिउगु खः।
६५ खा छेँ मिं नयाः करोडौं क्षति
सप्तरीया पकरी गाविसय् थौं सुथय् गां छगुलिं धइथें मिं नयाः निगू करोड तका बराबरया धनमाल क्षति जूगु दु। स्थानीय जगदेव मण्डलया छेँ दकलय् न्हापां मिं नःगु खःसा वयां लिपा जःलाखःलाया समेत यानाः ६५ खा छेँ मिं नःगु खः। उकी लानाः ३२ परिवार विस्थापित जूगु दु।
राजविराजया दमकल, प्रहरी, सशस्त्र प्रहरी व स्थानीयवासी जानाः थौं सुथय् ७ बजे तिनि मि स्याये फुगु खः। मिं नयाः आपालं ध्यबा, सामान व खाद्यान्न नष्ट जूगु दु।