थुकी कमिशनया खेल दु: मन्त्री भट्ट

थर्मल प्लान्ट हयेगु सरकारी ग्वसाःयात मन्त्रीया विरोध

येँ(सन्ध्या टाइम्स)/वर्तमान सरकारं लोडसेडिङया अन्त्य यायेगु अःपुगु उपाय कथं डिजलपाखें चले जुइगु थर्मल प्लान्ट हयेगु धकाः यानाच्वंगु तयारीयात सरकारय् हे दुथ्याःम्ह वाणिज्य तथा आपूर्तिमन्त्री लेखराज भट्टं विरोध यानादीगु दु। वय्कलं थर्मल प्लान्ट नेपाःया निंतिं उपयुक्त मजू धयादिल।
थौं रिपोर्टर्स क्लबं याःगु छगू साक्षात्कार ज्याझ्वलय् न्ववासें मन्त्री भट्टं धयादिल, 'छु देशय् डिजेल मदु, वहे देशय् डिजेल प्लान्ट हयेगु उपयुक्त जुइ मखु।'
डिजेल प्लान्टया थासय् ट्रान्स मिसन लाइन निर्माण, सोलार उर्जाया विकास व चिचीधंगु जलविद्युत विकासय् वनेगु उपयुक्त जुइगु बिचाः नं वय्कलं प्वंकादिल।
वय्कलं उर्जामन्त्री पोष्टबहादुर बोगटी थः सिबें नं इमान्दारम्ह नेता खः धासें मन्त्रालयया छुं तत्वं कमिसन नयेगु निंतिं थर्मल प्लान्ट न्यायेगु खँय् मन्त्रीयात सहमत याकूगु द्वपं नं बियादिल। उर्जामन्त्री बोगटी नं एकीकृत माओवादीया हे नेता खः।
मन्त्री भट्टं थर्मल प्लान्ट नेपाःया निंतिं तुयूम्ह किसि लहीगु थें जुइ धकाः नं धयादिल।
संचारकर्मीतय्गु न्ह्यसःया लिसः बीगु झ्वलय् वय्कलं छवाःया दुने पेट्रोलियम पदार्थया अभावया अन्त्य जुइ धकाः नं दावी यानादिल। पेट्रोलियम पदार्थ मदयाः यातायातया साधन तसकं म्हो जक चले जुयाच्वंगुलिं सर्वसाधारणया जनजीवनय् तकं लिच्वः लानाच्वंगु अवस्थाय् मन्त्रीं अथे धयादीगु खः।
मन्त्रिपरिषदं निर्णय यानाः नागरिक लगानी कोष व सञ्चय कोषया ब्याजया प्रतिशत सम्बन्धी विषययात कयाः ध्यबा बीगु ज्याय् लिबानाच्वंगुलिं पेट्रोलियम पदार्थया सहज आपूर्ति जुइ मफयाच्वंगु खुलासा नं यानादीगु दु।
निगुलिं हे कोषं साढे १२ प्रतिशत ब्याज झ्वनाच्वंगु खँ न्ह्यथनादिसें वय्कलं नेपालय् पेट्रोलियम पदार्थया सहज आपूर्तिया नितिं दीर्घकालीन राष्ट्रिय पेट्रोल नीति दयेकेगु तयारी जुयाच्वंगु खँ नं कनादिल। मन्त्री भट्टं आः च्वनीगु मन्त्रिपरिषद्या बैठकय् थम्हं उज्वःगु प्रस्ताव यंकेगु जुइ धकाः नं धयादिल।
आपूर्तिमन्त्री लेखराज भट्टं तत्कालया नितिं डिजेल व ग्याँसय् भ्याट चीकाः समस्या समाधान यायेगु जुइ धकाः नं धयादिल।
एकीकृत माओवादीया पोलिटब्यूरो दुजः तकं जुयादीम्ह मन्त्री भट्टं पार्टीया अध्यक्ष प्रचण्डया राजनीतिक प्रस्ताव व उपाध्यक्ष मोहन बैद्य किरण पक्षया फरक प्रस्तावय् छलफल यानाः दथुइ च्वंगु लँपु मालाः पार्टीया विवाद समाधान यायेगु ज्या जुइ धकाः नं दावी यानादिल।