गैंडा संरक्षणय् थुगु दँया सफलता

देय्या राजनीतिक तरलतां फुक्क हे ख्यः अस्तव्यस्त जुयाच्वंसां वन्यजन्तु संरक्षणया लागाय् धाःसा छगू न्ह्यथने बहःगु प्रगति जूगु लसताया बुखँ वःगु दु। चितवनया राष्ट्रिय निकुञ्ज दुने थुगु दँय् छम्ह हे गैंडायात चोरी शिकारीतय्सं स्याये मफुत। थगुने नगुने जूसा प्यम्ह न्याम्ह मखु दछिया दुने दर्जनौं गैंडा स्याना तइगु उगु जंगल थुगु दँय् गैंडाया लागिं पूरा हे सुरक्षित जूगु खनाः संरक्षणविद्त लसतां झूचाःगु दु। संसारं हे लोप जुजुं वनाच्वंपिं छपु जक न्यकू दुपिं गैंडात जैविक विविधताया दृष्टिकोणं अतिकं महत्वपूर्ण जीव खः। थौंकन्हय् नेपाः व भारतय् जक थज्याःपिं गैंडात ल्यं दनि। थ्व गैंडाया ल्याः यक्व दुगु कारणं हे चितवन राष्ट्रिय निकुञ्जयात युनेस्कों विश्व सम्पदाया धलखय् लाकूगु खः। विश्वं तना वनेत्यंगु दुर्लभ वन्यजन्तु जूगु कारणं थ्व जीव स्वयेगु लागिं आपालं पर्यटकत नेपाः वयेगु यानाच्वंगु दु। नेपाःया पर्यटन विकासया लागिं थ्व छगू बांलाःगु आधार खः। थौंकन्हय् नेपालय् पर्यटन वर्ष हनाच्वंगु इलय् हे विश्वयात थज्याःगु लसताया बुखँ न्यंके दुगु नेपाःया लागिं कम गौरवया खँ मखु ।

थुगुसी थथे गैंडाया सुरक्षा याये फुगुया श्रेय सुरक्षा निकाय लगायत स्थानीय जनतायात नं बीमाः। यदि निकुञ्ज जःखः च्वंपिं स्थानीय जनता सचेत मजूगु खःसा थ्व ज्या सम्भव जुइ मखु। मेगु खँ, थुगुसी चोरी शिकारीया ल्हातिं छम्ह हे गैंडा मसीगु लसताया खँ ला खः, तर थुकिया अर्थ आः गबलें हे चोरी शिकारीं गैंडा स्याइ मखुत धइगु धाःसा मखु। थुगुसी मफुसा मेगु पालय् उमिसं कुतः यायेफु। थुखेपाखे धाःसा संरक्षणविद्, सुरक्षा निकाय व स्थानीय जनता सकलें सतर्क जुया हे च्वनेमाः ।

More Stories Like this