लडाकुया '४६ करोड बेरुजु'

येँ (सन्ध्या टाइम्स)/माओवादीया लडाकुतय्गु निंतिं तलब/भत्ता, भरण पोषण व शिविर व्यवस्थापनया निंतिं सरकारं आः थ्यंमथ्यं ९ अर्ब १० करोड तका निकास यायेधुंकूगु दुसा उकी ४६ करोड तका बेरुजुइ लानाच्वंगु सीदुगु दु ।

संसदया सार्वजनिक लेखा समितिया थौं च्वंगु बैठकय् बेरुजु जूगु उगु ध्यबाया बारे सांसद्तय्सं न्ह्यसः तःगु खः। शान्ति तथा पुनर्निर्माण मन्त्रालयया अधिकारीतय्सं २०६३ मंसिर लिपा ९ अर्ब १० करोड ७९ लाख तका खर्च जूगु खँ न्ह्यथंगु खः। तर हिसाबं धाःसा ८ अर्ब २९ करोड ५ लाख तका जक खर्च जूगु खने दत। सरकार-माओवादी वार्ताया झ्वलय् तत्कालिन वार्ता पुचःया प्रमुख कृष्णबहादुर महरा मार्फत तत्कालिन सरकारं निकास याःगु ४६ करोड तका नं बेरुजुइ खने दुगु खः ।

शान्ति मन्त्रालयया सचिव धुव शर्मां धयादी कथं लडाकु भरण पोषणया निंतिं २ अर्ब ६५ करोड ५३ लाख बराबरया खर्च जूगु दु। अथे हे लडाकु भत्ताया नितिं ५ अर्ब ९९ करोड २४ लाख खर्च जूगु दु। सभासदतय्सं धाःसा किर्ते हस्ताक्षर यानाः नक्कली लडाकुया नामय् समेत दां यंकातःगु खनेदुगुलिं उकिया ल्याःचाः माग याःगु दु। एमाले सभासद् रामजी प्रसाद शर्मां पुनर्वर्गीकरणया झ्वलय् भारतीय नागरिक तकं लडाकुया नामय् दुथ्यानाच्वंगु घटनायात कयाः सरकारया ध्यानाकर्षण यानादीगु खः ।

माओवादी बैठकय् नं लडाकुया ध्यबा बारे न्ह्यसः थन न्ह्यानाच्वंगु माओवादी केन्द्रीय कमिटीया बैठकय् नं लडाकुया नामय् वःगु ध्यबाया पारदर्शिताया कयाः नेतातय्सं न्ह्यसः तःगु दु। लाइन संघर्षया झ्वलय् कडा रुपं प्रस्तुत जुयाच्वंपिं उपाध्यक्ष मोहन बैद्य किरण पक्षधर नेतातय्सं लडाकुयात वःगु ध्यबायात पारदर्शिताया माग याःगु खः। पार्टीया नेतृत्वं हे लडाकुया नामय् वःगु ध्यबा हिनामिना यानाच्वंगु द्वपं समेत बैद्य पक्षया नेतातय्सं बिउगु खः ।

थौं नं माओवादी केन्द्रीय कमिटीया बैठक जुयाच्वंगु दु। बैठकय् पार्टी अध्यक्ष प्रचण्ड व उपाध्यक्ष मोहन वैद्यं न्ह्यब्वयादीगु ब्यागलं ब्यागलं कथंया राजनीतिक दस्तावेजयात कयाः नेतातय्सं थःथःगु नुगःखँ तइ। म्हिगःया बैठकय् केन्द्रीय पदाधिकारी, स्थायी समितिया दुजःत नापं यानाः गुम्हेस्यां न्ववाःगु खःसा थौं ल्यं दुपिं स्थायी समिति व पोलिटब्यूरो दुजःतय्सं न्ववाइ। म्हिगः प्रचण्ड व वैद्य निम्हेस्यां नं न्वमवाःसां वय्कःपिनि पक्षधर नेतातय्सं धाःसा अतिकं कडा रुपं न्ववाःगु खः। म्हिगः न्ववाःपिं नेतातय् शैली व बिचाः स्वयेबलय् आः माओवादी पार्टी छप्पँ जुइ धकाः धाये मफइगु खँ समेत सूत्रं धाःगु दु ।