यलय् नं 'नेवाः ककस' गठन, बसन्तपुली येँ ककसया सभा
१८ गते नेवाः एकता दिवस न्यायेकेत पुलांपिं जनप्रतिनिधित सक्रिय
येँ (सन्ध्या टाइम्स)/वइगु पुस १८ गते नेवाः एकता दिवस तःजिक हनेगु नितिं म्हिगः नेवाः स्वायत्त राज्य मंकाः संघर्ष समितिया ग्वसालय् यल उपमनपाया पुलांपिं जनप्रतिनिधितय्गु छगू भेलां 'नेवाः ककस' गठन याःगु दु। झिंन्याम्हेसिया उगु नेवाः ककसया संयोजकय् पुलांम्ह मेयर बेखारत्न शाक्य च्वनादीगु दुसा उप संयोजकय् चन्द्र महर्जन व सानुकाजी महर्जन व सचिवय् प्रेम महर्जन च्वनादीगु दु ।
नेवाः स्वायत्त राज्य मंकाः संघर्ष समितिया नायः नरेशवीर शाक्यया सभापतित्वय् जूगु उगु ज्याझ्वलय् थीथी ख्यःया नेवाःतय्सं नं ब्वति काःगु खः ।
अथे हे कन्हय् येँ मनपाया पुलांपिं जनप्रनिधितय्गु 'ककस' पाखें बसन्तपुली सभा याइगु जूगु दु। थ्वहे दथुइ ककसया कजि केशव स्थापितं नेवाः एकता दिवस तःजिक हनेगु नितिं वकुन्हु खुलामञ्चय् जुइगु ज्याझ्वलय् ब्वति कायेत सकल महानगरवासीयात आह्वान यानादीगु दु। वकुन्हु मनपावासीतय्सं थःपिनि ज्याकू, पसः, बजाः बन्द यानाः ज्याझ्वलय् सक्रिय रुपं सहभागी जुइत नं वय्कलं आह्वान यानादीगु दु ।
उकथं हे नेवाः एकता दिवसया ज्याझ्वः बारे जानकारी बीत मंकाः संघर्ष समितिं कन्हय् नेवाः मिडिया क्लब टेकूया नारायण परिवार क्लबया भवनय् न्हिनय् ११ बजे पत्रकार सम्मेलन यायेत्यंगु दु ।
थ्वहे झ्वलय् मंकाः संघर्ष समिति येँ १७ वडा कचापाखें म्हिगः सहलह मुँज्या यात। कचाया नायः विजय मालीया सभापतित्वय् जूगु उगु ज्याझ्वलय् संघर्ष समितिया सुजिव बज्राचार्य, डा. महेशमान श्रेष्ठपिंसं एकता दिवस व नेवाः स्वायत्त राज्यया महत्व बारे न्ववानादीगु खः। पुलांम्ह वडा अध्यक्ष नापं संघर्ष समिति वडा कचाया सचिव महेन्द्र विलास जोशीं न्ह्याकादीगु उगु ज्याझ्वलय् कचाया कोषाध्यक्ष नविन मानन्धरं सुभाय् बियादीगु खः। ज्याझ्वलय् माओवादीया निलकण्ठ माली, कांग्रेसया कृष्णदास श्रेष्ठ नापं वडाया थीथी नेवाः खलः पुचःया प्रतिनिधितय्सं नं ब्वति काःगु खः ।
