सरकार व दलित दथुइ ५ बुँदाया सहमति

येँ (सन्ध्या टाइम्स)/आन्दोलनय् कुहां वयाच्वंपिं दलित व सरकार दथुइ थौं सुथय् जूगु वार्ताय् न्यागू बुँदाया सहमति जूगु दु। सहमति लिपा संयुक्त राजनीतिक दलित संयन्त्रं घोषणा यानातःगु नेपाल बन्द ज्याझ्वः स्थगित जूगु दु। थौं जूगु वार्ताय् प्रधानमन्त्री डा. बाबुराम भट्टराईपाखें दलिततय्गु मागयात कयाः थौं संसदय् संवोधन यायेगु, कालिकोटय् हत्या जूम्ह मानवीर सुनवारया मस्तय्त उच्च शिक्षा तक निःशुल्क ब्वंकेगु, अपराधीयात कारवाही यायेगु, जेठ महिनाया दुने सहिदया निंतिं मापदण्ड तयार यायेत संयन्त्र दयेकेगु नापं उगु मापदण्डय् लात धाःसा सुनवारयात नं सहिद घोषणा यायेगु सहमति जूगु दु ।