बौद्ध सम्पदा संघ ख्वपया १६ क्वःगु साधारण सभा

ख्वप (सन्ध्या टाइम्स)/भक्तपुर बौद्ध सम्पदा संघया झिंखुक्वःगु दँमुँज्या व साधारणसभा वंगु शनिवाः क्वचाल। वाय्च्वंगु बौद्ध शान्ति विहार, बुलुइ बुद्ध पुजा व शील प्रार्थना यासें न्ह्याःगु ज्याझ्वलय् अनुमोदन यासें संघया भावी कार्य योजनाया बारे विस्तृत विवरण न्ह्यब्वयेत कार्यसमितियात निर्देशन नं बिउगु खः। साधारणसभाय् बौद्ध शान्ति विहार परियति केन्द्रया अध्यक्ष जयन्ती महर्जनं बौद्ध शान्ति विहारया म्हसीका बियादीगु खःसा विहारया श्रद्धेय भन्ते बुद्धपियं धर्मदेशना यासें बौद्ध सम्पदाया संरक्षण व सम्बर्द्धन यानाः न्हूगु पुस्ताया सहभागिता व सक्रियता अप्वयेके माःगु दकलय् तःधंगु आवश्यकता दु धासें पुण्यानुमोदन यानादिल ।

ख्वपया थीथी बौद्ध सम्पदाया संरक्षण व सम्बर्द्धनय् थःगु हे श्रोतं थीथी ज्याझ्वः न्ह्याका वयाच्वंगु बौद्ध सम्पदा, संस्कृतिया अध्ययन अनुसन्धानया सुरुवात याना वयाच्वंगु संघं स्वनिगःया थीथी थाय्या बौद्ध विहार, तीर्थस्थलया अध्ययन व अवलोकन भ्रमणया नं ग्वसाः ग्वयाच्वंगु दु। संघया ग्वसालय् बौद्ध अध्ययन कक्षा, अनुसन्धान, उद्घोषण तालिम, बौद्ध संगीत व चर्या नृत्य प्रदर्शनी, हना ज्याझ्वःया नं ग्वसाः ग्वयेगु ताः तयाच्वंगु दु। साधारणसभा क्वचायेकाः प्याङ्गया पुलांगु बस्ती, बज्रवाराही, ठेचोया नं अवलोकन भ्रमण याःगु खः। धारण सभाय् ब्वति काःपिं व संघयापाखें बौद्ध शान्ति विहार, बुलुया सहयोगार्थ रु. ७५८५/- आर्थिक ग्वाहालि व संघया प्रकाशित सफू नं उपहार स्वरुप लःल्हायेगु ज्या जूगु खः ।
ज्याझ्वलय् छ्याञ्जे महेन्द्रराज शाक्यं सघया वार्षिक प्रगति प्रतिवेदन व दांभरि प्रदीपरत्न शाक्यं आ.व. २०६७/६८ या लेखा परीक्षण प्रतिवेदन व थौंतकया आर्थिक प्रतिवेदन बारे संघया दुजःपिनि दथुइ सहलह, जिज्ञासा व न्ह्यसःलिसः यायेगु ज्या नं जूगु खः। ज्याझ्वः संघया अध्यक्ष पद्मसुन्दर शाक्यया सभापतित्वय् जूगु खः। ज्याझ्वःया न्वकु पुष्परत्न शाक्यं लसकुस यानादीगु उगु ज्याझ्वलय् दुजः सप्तचन्द्र बज्राचार्यं सुभाय् न्वचु बियादीगु खः।