वेनं गच्छेदारयात नाप मलात
नेपाःया उपप्रमं कच्चा कुटनीतिक व्यवहार याःगु द्वपं
येँ (सन्ध्या टाइम्स)/स्थगित जूगु चिनियाँ प्रधानमन्त्री वेन जियाबाओया नेपाः भ्रमण हानं याकेगु लागिं सुरक्षाया ग्यारेन्टी बीत चीन झाःम्ह उपप्रधानमन्त्री लिसें गृहमन्त्री विजय गच्छेदारयात प्रधानमन्त्री जियाबाओं नापलायेत तकं अस्वीकार याःगु समाचार वःगु दु। 'अनलाइन खबर डट कमं' थौं थ्व समाचार बिउगु खः ।
चिनियाँ प्रधानमन्त्री नापलायेत नेपालंनिसें हे कुटनीतिक च्यानलं खँ मिले मयासे तप्यंक चीन थ्यंकाः प्रधानमन्त्री नापलायेमाल धकाः 'इच्छा' प्वंकूगु कारणं वय्कःया इनापयात अनया परराष्ट्र मन्त्रालयं अस्वीकार याःगु खँ नं समाचारय् धयातःगु दु ।
समाचारय् धयातः कथं उपप्रम गच्छेदारं अतिक कच्चा कुटनीतिक व्यवहार याःगु कारणं तम्वःपिं चिनियाँ अधिकारीतय्सं वय्कःयात चिनियाँ प्रधानमन्त्री नापलाये फइ मखु धकाः लिसः बिउगु खः। थ्व स्वयां न्ह्यः चीन झाःम्ह उपप्रधानमन्त्री लिसें परराष्ट्रमन्त्री नारायणकाजी श्रेष्ठयात धाःसा चिनियाँ प्रधानमन्त्री जियाबाओं नापलाःगु खः। उपप्रम श्रेष्ठं प्रम जियाबाओयात नाप लानाः हे नेपाः भ्रमणया ब्वनापौ बियादीगु खः गुकियात वय्कलं स्वीकार यानादीगु खः ।
थौंकन्हय् चीनय् दीम्ह उपप्रम विजय गच्छेदारं नेपालय् विदेशी राजदूततय्सं तकं चाहे जुइसातकि प्रधानमन्त्री नापलाये फइ थें चीनय् नं अथे हे जुइ धकाः थन छुं तयारी तकं मयासे नापलायेगु इच्छा याःगुलिं चिनियाँ अधिकारीत तम्वःगु खः ।
लुमंकेबहः जू, चिनियाँ प्रधानमन्त्री वेनं अन्तिम इलय् वयाः नेपाः भ्रमण रद्द याःगुया छता कारण सरकारय् दुपिं गच्छेदार लगायतया मधेसवादी पार्टीतय्सं थःगु भ्रमणया इलय् लाक्क हे नेपाःया प्रधानमन्त्री डा. बाबुराम भट्टराईया सरकार तकं क्वःथला बीगु ख्याच्वः बिउगुलिं नं खः धायेगु याः। नेपालं चीनलिसे नं भारतलिसे थें बिप्पा सम्झौता याइन धकाः भारतया हे इशाराय् मधेसवादी पार्टीतय्सं प्रम भट्टराईयात चेतावनी स्वरुप थीथी कथंया माग न्ह्यःने तयाः सरकार क्वःथलेगु ख्याच्वः बिउगु विश्लेषण अबलय् जूगु खः ।
गृहमन्त्री गच्छेदारं थःगु भ्रमण पुचः गठन याःबलय् नं उकी सशस्त्र प्रहरीया प्रमुखयात तयाः जनपद प्रहरीयात प्रमुखयात मतःगु कारणं विवाद जूगु खः ।
