सर्वोच्चया दरपीठ विरुद्ध मेगु रिट तयेगु तयारी
येँ (सन्ध्या टाइम्स)/संविधानसभाया म्याद थप याये दइ मखु धकाः सर्वोच्च अदालतं याःगु फैसलायात पुनरावलोकन यायेमाःगु माग यासें संसद व सरकारं तःगु रिटयात दर्ता तकं मयासें दरपीठ याना हःगुलिं आः संसद व सरकारं उगु दरपीठ विरुद्ध हे मेगु रिट तयेगु तयारी सुरु याःगु दु ।
सर्वोच्चय् दरपीठ विरुद्ध रिट तयेगु लागिं संसद प्रमुख सभामुख सुवास नेम्वाङ व सरकार प्रमुख प्रधानमन्त्री डा. बाबुराम भट्टराईं कानूनविद् नापं थीथी दलया नेतात लिसे सहलह ब्याकादीगु दु। दरपीठ विरुद्ध रिट तयेवं उकियात तप्यंक हे बेञ्चय् तयाः वहस याइ। छुं जुयाः बेञ्चं दरपीठ खारेज यात धाःसा पुनरावलोकन जुइ मखु, सर्वोच्चया निर्णय यथावत कायम जुइ ।
थ्वहे दथुइ संविधान निर्माणय् विवाद जुयाच्वंगु विषय नापं सर्वोच्च अदालतं दरपीठ याःगु विषययात कयाः सहलह ब्याकेत थौं संविधान सभाया संवैधानिक समिति अन्तर्गत उपसमितिया बैठक च्वनाच्वंगु दु ।
