फैसलायात लसकुस

येँ (सन्ध्या टाइम्स)/नेपाली कांग्रेसया नेतृ सुजाता कोइराला व नेकपा (मसाल) या महामन्त्री मोहनविक्रम सिंहं सर्वोच्च अदालतं याःगु फैसलायात लसकुस यानादीगु दु। नेपाल प्रेस युनियन बाग्लुङं थौं सुथय् याःगु पत्रकार भेटघाटय् न्ववासें नेकां नेतृ कोइरालां धयादिल 'संविधान मदयेकीगु संविधानसभाया म्याद थपे यानाः नेतात लहीगुया अर्थ छु? लोकतान्त्रिक पद्धतिइ विश्वास याइगु कांग्रेसं सर्वोच्चया निर्णययात लसकुस याःगु दु ।'

वय्कलं धयादिल 'जनतायाथाय् वनेत सुं नं ग्यायेमाःगु मदु, माओवादीं अस्थिरता ताःहाकः यानाः ब्रम्हलुट यानाच्वंगु दु ।'

मसाल नेता मोहनविक्रम सिंहं थन छगू वक्तव्य पिकासें सर्वोच्चं याःगु फैसलायात लसकुस यानादीगु खः। थःपिंसं न्हापांनिसें हे संविधानसभाया म्याद थपे याये मजिउ धयाच्वनागु खँ नं वय्कलं लुमंकादीगु दु ।