छम्ह हे गैंडा मस्याः !
येँ (सन्ध्या टाइम्स)/थगुनेया जनवरी ३ तारिखं निसें आः तक चितवन जंगलय् छम्ह हे गैडा चोरी शिकारीपाखें मस्याःगु खँ सीदुगु दु। थुकिं यानाः उत्साहित जूपिं संरक्षणविद् व चितवनया अधिकारीतय्सं आः वइगु जनवरी ३ तारिखयात 'गैंडा चोरी शिकार शून्य वर्ष' या रुपय् हनेगु तयारी समेत याःगु दु ।
चितवनया राष्ट्रिय निकुञ्ज दुने दछि तक छम्ह हे गैंडा चोरी शिकारीतय्सं स्याये मफुगु थ्व घटनायात गैंडा संरक्षणया ख्यलय् छगू तःधंगु उपलब्धीया रुपय् काःगु दु। निकुञ्ज दुनेया सुरक्षा व स्थानीय जनतायाके ब्वलंगु जनचेतनाया कारणं थथे जुइफुगु खँ संरक्षणविद्तय्सं धाःगु दु। वंगु ०५७/५९ दुने चितवनय् ३७ म्ह गैंडा स्याःगु खः। छपु जक न्यकू दुम्ह गैंडा नेपाः व भारतय् जक दु। नेपालय् थज्याःपिं गैंडातय् ल्याः ५०० म्ह दु ।
