अन्तर्राष्ट्रिय बौद्ध विद्यापीठ दयेकेगु प्रस्ताव
यल (सन्ध्या टाइम्स)/अन्तर्राष्ट्रिय बौद्ध विद्यापीठ तदर्थ समिति व श्री सुमंगल विहार बौद्ध संघया मंकाः ग्वसालय् अन्तर्राष्ट्रिय बौद्ध विद्यापीठ व बुद्धघोष गुनानुस्मरण भवन दयेकेत आर्थिक ग्वाहालि म्हयेगु ज्याझ्वः न्ह्यात। यलया स्टाफ कलेजय् जूगु उगु ज्याझ्वलय् भवन दयेकेगु विषयय् ई. सुरेश अमात्यं जानकारी बियादीगु खः। यलया लँखुसिइ च्वंगु सुमंगल विहार परिसरय् निर्माण जुइत्यंगु उगु विहारया लागत निगू करोडत्या तुइगु अनुमान नं ग्वसाः खलकं याःगु दु ।
ज्याझ्वलय् श्रद्धेय भन्ते भिक्षु डा. प्रज्ञालोक महास्थवीरं "नेपालय् थेरवाद बौद्ध विहारीय शिक्षाया लागि न्हूगु पाठ्यक्रम" विषयक ज्यापौ न्ह्यब्वयाबिज्याःगु खः। ज्याझ्वलय् वसपोलं नेपालय् नं अन्तर्राष्ट्रिय बुद्धिष्ट कलेज नीस्वनेगु ताः तयाः उगु सोधपत्र तयार यानागु खँ कनाबिज्याःगु खः ।
थुकिया लिसें ज्याझ्वलय् पाहां कथं झाःम्ह श्रीलंकाया राजदूत थोसपाल हे वर्गे, लुम्बिनी विश्वविद्यालयया उपकुलपति डा. त्रिरत्न मानन्धर, त्रि.वि. बौद्ध अध्ययन विभागया प्रमुख मिलन शाक्यपिंसं नं थःथःगु बिचाः प्वंकादीगु खः। भिक्षु धर्ममूर्ति महास्थवीरं लसकुस यानाबिज्याःगु उगु ज्याझ्वलय् भिक्षु पञ्ञारत्नं सुभाय् बियाबिज्याःगु खः। ज्याझ्वः भिक्षु ज्ञानपूर्णिक महास्थवीरया सभापतित्वय् न्ह्याःगु खः ।
